Siulittaasup oqalugiarluni nalunaarutaa 2010

Royal Arctic Line A/S-imi ataatsimeersuarneq. Siulittaasup oqalugiarluni nalunaarutaa
Nuummi pingasunngorneq 14. apriili, 2010

”Ajornartorsiorneq ajunngitsumik anigorneqarpoq”.

Naak ukioq qaangiuttoq annertuumik unammillernartarlunilu ilaatigut ajornartorsiorfiusaraluartoq taamatut qulequtsiivunga maannakkut suliffeqarfiup Royal Arctic Line A/S-ip ukiut 17-issaannik ingerlatsiffiata 2009-p kingorna inissisimaffia tunngavigalugu.

Ukioq 2009 tassaavoq ukiut arlallit ingerlaneranni aatsaat taamak malunnaateqartigisumik Nunatsinnut assartukkat annikillerujussuarnerannik tamatumalu kingunerisaanik kaaviiaartitat malunnaatilimmik appariarnerannik maluginniffigisarput.

Usit assartukkat appariarnerat nunarsuaq tamakkerlugu aningaasarsiornikkut aamma aningaasaqarnikkut ajornartoornerup kingunerisaasa ilagaat, aammattaaq tamanna 2009-mi allatigut malunniuppoq. Minnerunngitsumik umiarsuaatileqatigiiffiup nutaanik sanaartortitsilluni pilersaarutaanut, umiarsualiorfiup Wadan Yardsip akiliisinnaajunnaarluni uninneratigut umiarsuit nutaat marluk sanaartorneqarnerannut isumaqatigiissut atorunnaarsinneqarpoq.

Kisianni unammillernartunik tamakkuninnga naammattuuinerup kingorna 2009 aammattaaq ukioq tassaavoq Royal Arctic Linep naleqqussarsinnaanerminut takutitsiffia. Siulersuisummi nuannaarutigalugu qularnaarlugu paasivaat aningaasartuutinut eqqummaarinninnissamik piumasaqaatip kingunerisaanik - tamanna ukioq kaajallallugu oqariartuutaajuarpoq - allaffissornermut aningaasartuutit 14 millionit koruuninik appariarsimanerat.

Naak kaaviiaartitat 2008-mi 847 millionit koruuniniit 2009-mi 789 millionit koruuninut appariarsimagaluartut Royal Arctic Linep 2009 naatsorsuutitigut angusarai akileraaruteqannginnermi sinneqartoorutit 23,0 millionit koruunit akileraaruteqareernermilu 18,5 millionit koruunit. Sanilliunneqassapput 2008-mi naatsorsuutitigut angusat akileraaruteqannginnermi angusat 10,1 millionit koruunit akileraaruteqareernermilu 6,2 millionit koruunit. Ineriartornerup ilorraap tungaanut ingerlaneranut pissutaanerpaasut tassaapput aningaasartuutit annikillisinneqarnerat aamma assartuinermi akigitinneqartut qaffanneqarnerat 2009-mi januaarimi atuutilersoq.

Ajornartoormi sanngisuunngorsimalluni ingerlaqqinnissamut anguniagassat erseqqissut pisariaqarput. Tunngavissat allanngorsimasut suliffeqarfiup siunissamut pilersaarutaa – Naleraq 2015 – sunniuteqarfigaa, taannalu 2009-mi nutarterneqarpoq. Pilersuinissamut qularnaarineq tunngavigilluinnarlugu Naleraq 2015-imi suliffeqarfissuup siunissami anguniagassai aalajangersarneqarput. Anguniakkat anguneqassapput uagutsinnik soqutigisaqartut – sulittakkat, piginnittut aamma sulisut eqqummaariffigiutigalugit, kisianni aammattaaq tamatuma saniatigut ingerlatsinerup naleqqussaatigalugu ingerlatsinernik nutaanik aamma niuerfinnik nutaanik ineriartortitsinikkut. Siunissarmi ungasinnerusoq eqqarsaatigalugu ingerlatsinermi naleqqussaaneq kisiat tunngavigissagaanni Royal Arctic Linep anguniagaasa ilaannaat anguneqarsinnaapput. Taamaattumik siunissamut pilersaarutip ilarujussuani sammineqarput ingerlatsinerit sullissisussaatitaanermut isumaqatigiissummut attuumassuteqanngitsunik niuerfinnik pioreersunik aamma nutaanik annertusiartortitsinissaq, aamma ineriartortitsinissaq.

Siunissamut pilersaarummi ineriartortitsinermut takussutissaasut siulliit ilagaat Arctic Base Supply A/S-ip 1. januaari 2010 aallarnerfigalugu pilersinneqarnera Danbor Service A/S 50/50 piginneqatigalugu. Arctic Base Supply A/S-ip uuliasiornermik ingerlatsisussat Nunatsinni tamatuminnga ineriartortitsilersut sullinniarpai, uuliasiornermilu ingerlatsinerni sullissinerit assartuinermut tunngasut suugaluartulluunniit neqeroorutiginiarpai. Royal Arctic Linep aammattaaq 2009-mi Sikuiuitsumi Kujallermi ilisimatusarluni misissuiffiit arlaqartut isumaqatigiissuteqarfigai usinik siumut utimullu assartuisarnissamik.

Suliffeqarfimmi nammineq Naleraq 2015-imi qitiutinneqarput ilinniartitaanerit aamma sulisutta piginnaasaannik ineriartortitsiuarnissaq. Taakkulu tassaapput ingerlatat ikittunnguit ilaat annikillisaaffigineqarsimanngitsut, kiisalu 2009-p naanerani ilinniartuutigineqartut 73-iusut naqissuserpaat Royal Arctic Linep Nunatsinni ilinniagaqarfiit annertunersaasa ilaattut inissisimanera. Royal Arctic Linemi ilinniagaqarsimanerup kingunerisinnaavaa piginnaasat tunngavigalugit umiarsuaatileqatigiiffimmi atorfeqarluni qaffakkiartornissaq, taamatuma saniatigut suliffeqarfinni allani atorfeqalernissamut aammattaaq periarfissiilluartuuvoq.

Royal Arctic Bygdeservicep 2009-mi nunaqarfinnut imaatigut assartuinermik sullissineq ingerlateqqissimavaa. Ukioq 2009 pingaaruteqarluinnartuuvoq, tassami 2010-mut Aningaasaqarnermut Inatsisikkut umiarsuaaqqanik nunaqarfiliartaatinik nutaanik aningaasaliissuteqarnissaq akuersissutigineqarpoq. Alloriarneq tulliuttoq tassaavoq Namminersorlutik Oqartussanut sullissinissamut isumaqatigiissuteqarnissaq ukiuni 20-ni atuuttussamik, tamatuma siunissami nunaqarfiit imaatigut pilersorneqarnissaannik qulakkeerinerup saniatigut umiarsuaaqqanik nunaqarfiliartaatinik nutaanik aningaasalersuinissaq tunngavilissavaa.

Nutaanik sanaartortitsinerup taamaatiinnartariaqartup unammillernartui illua’tungaanut saatsinneqarput, tassa Royal Arctic Linep nutaanik sanaartortitsinisamut pilersaarutaa aamma Royal Arctic Bygdeservicep umiarsuaaqqanik nutaanik sanaartortitsinissaa ataatsimoortinneqarmata. Siunertaq pissusissamisoortuuvoq, sapinngisamik sipaarniuteqarnissaq kiisalu annertusititsinerup tamanut iluaqutaanissaa anguniarneqarmata.

Arctic Umiaq Linep kitaata sineriaani ilaasunik angallassinermik Kujataani Narsamiit Avannaani Ilulissanut sulissinini sullittakkaminik assut iluarineqarluni ingerlappaa. Ajoraluartumilli naak aningaasartuutit annertuumik eqqummaariffigineqaraluartut uagut qularnaarlugu paasivarput suliffeqarfiup aningaasanik tapiiffigineqarnani ingerlanneqarnissaa ajornartoq. Arctic Umiaq Linep kitaata sineriaani angallassinerminik ingerlatsiinnarnissaanut politikikkut aalajangertoqarnissaa apeqqutaalerpoq sullissinissamik isumaqatigiittoqarnissaa imaluunniit amigartooruteqarnermut sillimmasiinissaq ukiuni arlalinni atuuttussaq tamatumuunakkut qulakkeerniarlugu akilersinnaasumik ingerlatsinissaq. Paasisavut tunngavigalugit Assartuinermut Isumalioqatigiissitap suliaminik naammassinninnissa nalunaarusiassaalu utaqqineqarput.

Nunatsinni illoqarfiit ilaanni umiarsualiveqarfinni suli periarfissaaleqisoqarpoq. Apeqqutit Nunatsinni umiarsualivinnut tunngasut aammattaaq Assartuinermut Isumalioqatigiissitap suliarisassatut malitassaani ilaapput. Royal Arctic Line Assartuinermut Isumalioqatigiissitap suliaanik tapersersuivoq qilanaaralugulu isumalioqatigiissitap takorluugaasa inernerinik ingerlatseqqinnissani – ingammik umiarsualiviit eqqarsaatigalugit. Nunatsinni umiarsualivinnut tunngatillugu iliuuseqaqqinnissaq siusinnerpaamik 2010-mi ukiup affaani kingullermi naatsorsuutigineqarsinnaavoq.

Ukiup kingulliup ingerlanerani Royal Arctic Linep Qitiusumik Umiarsualiveqarnissamut Isumaqatigiissutissaq isumaqatigiinniutigivaa. Aalborg Havn A/S-ip aamma Royal Arctic Linep akornanni umiarsualivittut aallaaviusutut isumaqatigiissuteqarneq maannakkut naammassisimanera nuannarutigaara. Suliassat pilertornerusumik ingerlanneqarsinnaanerat annertusarniarlugu kiisalu ineriartortitsinissamut periarfissat pitsanngorsarniarlugit nutaamik quersualiortoqassaaq aammattaaq allaffiliortoqassalluni. Tamakku illuatungilerniarlugit isumaqatigiissut 2022-mut sivitsorneqarpoq, isumaqatigiissutillu kingunerissaanik Aalborgimi suliffeqarfiit pigineqartut ataatsimoortinneqalerlutik kattupput.

Aningaasarsiornikkut ajornartoornerup kingunerisaanik nunarsuarmi aningaasaqarnerup appariarnera aammattaaq 2009-mi aatsitassarsiornermi misissuinernik ingerlatsinerup aamma piiaanerup annikillineranik kinguneqarpoq. Taamaattorli ukiup qaammataani kingullerni aatsitassarsiornerup annertusiartulaarnera malugisimavarput. Uuliasiorneq aningaasarsiornikkut ajornartoornerup taamak annertutigisumik sunniuteqarfiginngilaa. Qillerinerit siulliit Qeqertarsuup avataani 2010-p aasaanerani aallartinneqassapput. Arctic Base Supply A/S-imit siunertarineqarpoq suliffeqarfinnut uuliasiornermik ingerlatsisunut kiffartuussisutut ingerlatsinissaq.

Matumuuna suliffeqarfimmut tunngasut pingaarnerit saqqummiuppakka, tamatumalu saniatigut suliffeqarfiup ukiumoortumik nalunaarusiaa naqitaq innersuussutigaara, taanna ataatsimeersuarnermi peqataasunut piareersimavoq.

Suliffeqarfiup ingerlaannarnissaa isumalluarfigaara, kiisalu siulersuisut sinnerlugit periarfissaq manna iluatsillugu sulisunut aamma pisortamut sulilluarsimanissinnut qujaniarpunga.

Siulersuisut sinnerlugit matumuuna naatsorsuutit aamma ukiumoortumik nalunaarusiap ataatsimeersuartunit ilalerneqarlutik oqaluuserineqarnissaat inassutigaara.

Martha Labansen

Siulersuisuni siulittaasoq