Aktianik piginnittut nalunaarutaat

Royal Arctic Line-p 2010-mi ataatsimeersuarnissaanut ilanngussaq 3 – Aktianik piginnittut nalunaarutaat

”Aallarniutigalugu Naalakkersuisuniit Royal Arctic Line-mi siulersuisut, ulluinnarni aqutsisut sulisullu ukiumi qaangiuttumi sulilluarsimanerannik qutsavigerusuppakka.

Ukioq 2009 ingerlatseqatigiiffinnut tamanut, suliassaqarfiit suliffeqarfiillu angissusaat akimorlugit arlalitsigut annertuumik unammillernartuusimavoq. Pingaartumik silap pissusaata eqqumaffigineqarnerata annertusinera aningaasaqarnikkullu nalorninartorsiorneq 2009-mi sulianut aalajangiisuusarsimavoq, aammalu 2010-mi tamanna suli atuuttussaavoq.

Royal Arctic Line-p inuiaqatigiinni sullissisutut pingaarutilittut inissisimanermini, ilaatigut ingerlatseqatigiiffiup nukissiuutinik atuinerata annikillisarniarneratigut, Kalaallit Nunaanni gassinik silaannarmik kissatsitsisartunik aniatitsinerup killilersimaarniarnerani akisussaaqataanissaa Naalakkersuisut kissaatigaat. Taamaalilluni silaannaap pissusaa pitsaanerulersinniarlugu suliniutit, suliffeqarfimmi aqutsilluarnermut aningaasartuutit appasitsinneqarnissaannik aallussiffiusumut ingiaqatigitinneqarsinnaapput.

Aningaasaqarnikkut nalorninartorsiorneq aamma Royal Arctic Line-mut sunniuteqarsimavoq, tassani ilaatigut nassiussat tamarmiusut amerlassutsimikkut ikilinerat malugineqarsinnaasimammat.

Oqariaasitoqaq, ”imatut ajortigisoqanngilaq tamanna allatigut iluaqutigineqarsinnaanani” aningaasaqarnikkut nalorninartorsiornermi uppernarsineqarpoq. Tassami aningaasaqarnikkut nalorninartorsiorneq amerlanertigut sunniuteqarnerlukkaluartoq, nalorninartorsiorneq aamma ingerlatseqatigiiffiup aningaasartuutitigut ilusilersugaanerata eqqumaffigineqarnerulerneranut peqqutaaqataavoq. Ingerlatseqatigiiffimmi isertitat ikiligaluartut, ingerlatseqatigiiffiup aningaasartuutikillisaanissaq pikkoriffigisimagaa, taamaattumillu pitsaasunik angusaqarfigisimagaa Naalakkersuisuni maluginiarneqarpoq. Tamanna imminermini naammagisimaarnartutut isigineqarpoq.

Ingerlatseqatigiiffik umiarsuarnik Mary Arctica-tut ittunik marlunnik nutaanik sananissamik Royal Arctic Line-p isumaqatigiissuteqarfigisimasaa 2009-mi aggustimi akiliisinnaajunnaarnerminik nalunaaruteqarsimasoq paasigatsigu, pisut ingerlanerat Naalakkersuisuniit pissangalluta malinnaaffigisimavarput. Naalakkersuisut naammagisimaarlugu paasivaat, Royal Arctic Line taamatut pisoqarnissaanut ajunngivissumik qulakkeerisimasoq, taamaattumillu aningaasanik annaasaqartoqanngitsoq.

Umiarsualivik aallaaviusussaq pillugu Aalborg Havn A/S-imut aamma Royal Arctic-mut isumaqatigiissutip sivitsorneqarnissaa inissinneqaqqammerpoq. Isumaqatigiissuteqarnerup kingunerisaanik Aalborgimi aaqqissuussaanikkut aamma ingerlasussanik piareersaasarnikkut aqutsinikkullu suliat arlallit katersornissaat, tamatumalu peqatigisaanik niuerfinnik nutaanik ineriartortitsinissaq tapersersuinissarlu Royal Arctic Line-mut ajornarunnaassaaq.

2009-mi ukiakkut Naalakkersuisut assartuussineq pillugu isumalioqatigiissitamik, Kalaallit Nunaanni assartuussisarnermik tamarmiusumik misissuinissamik suliakkerneqartumik pilersitsipput, misissugassanullu Kalaallit Nunaanni umiarsualivinnik sanaartornissaq alliliinissarluunniit ilaatinneqarput. Suliaqarneq taanna qanorluunniit inerneqaraluaruni Royal Arctic Line-p suliaanut annertuumik sunniuteqartussaavoq, aammalu ingerlatseqatigiiffiup siunissami iliuuserisassaannut atatillugu isumalioqatigiissitap isummersuutaanut Royal Arctic Line tusaaniarumaartoq Naalakkersuisunit naatsorsuutigineqarpoq. Isumalioqatigiissitap inassuteqaatiminik 2010-mi aggustip qaammataani Naalakkersuisunut saqqummiussisinnaanissaa naatsorsuutigineqarpoq.

Nunat sanilitta, ilanngullugit Island aamma Amerikap Avannarliup nunavittaa, suleqatigineqarnerisa niueqatigineqarnerisalu annertusineqarnissaa suli Naalakkersuisut anguniagaraat. Anguniakkap taassuma piviusunngortinneqarnissaanut Royal Arctic Line pingaarutilittut inissisimavoq, aammalu ingerlatseqatigiiffiup tamatuma aallunneqarnera ingerlatiinnassagaa Naalakkersuisut naatsorsuutigaat. Taamaattumik nuannaarutigalugu maluginiarparput, Royal Arctic Line-p A.P. Møller – Maersk Gruppens selskab, Danbor Service A/S –suleqatigalugu 2010-mi 1. januar ingerlatseqatigiiffik Arctic Base Supply A/S pilersissimammagaa. Ingerlatseqatigiiffiup nutaap uuliasiorfiutileqatigiiffinnut, siunissami Kalaallit Nunaata imartaani suliaqalersussanut kiffartuussinernik neqerooruteqartarnissaa siunertarineqarpoq. Suliniut taanna Naalakkersuisut iluarisimaarpaat. Ingerlatseqatigiiffik nassiussat amerlassutsimikkut appariartornerannik misigisaqarnerlussimagaluarluni nutartersinnaanera, aammalu niuerfinnik nutaanik pilersitsisinnaanera takullugu nuannaarnarpoq.

Siunissami ungasinnerusumi aningaasaqarnikkut imminut napatissinnaalernissamik anguniagaqarnerup kingunerisaanik tamatta sapinngisatsinnik assoroortariaqarpugut. Pisortat aningaasaataat isumatusaarluartumik, aammalu ingasaassinngitsumik tunuarsimaartumillu atorneqassapput.

Naggasiutigalugu periarfissaq manna iluatsillugu siulersuisut qullersaqarfillu ukiumi qaangiuttumi sulilluarsimanerannik qutsavigiumavakka. Kiisalu periarfissaq manna iluatsillugu qullersaqarfik qinnuigissavara, ingerlatseqatigiiffimmi sulisunut, ukiumi qaangiuttumi sulilluarsimanerannut annertuumik qujassuteqarnerput apuuteqqullugu.

Taamatut oqaaseqarluta Naalakkersuisuniit siulersuisut nalunaarutaat tusaatissatut tiguarput.