COP16-mi nunarput saqqumilaartinneqarpoq

Silap pissusaanut Ministerip Lykke Friisip naalagaaffeqatigiit DK sinnerlugu oqalugiarami Nunatsinni silap pissusaanut tunngasut ersialaartippai.

Tamatuma sanitiagut nunat inoqqaavisa silap pissusaata allanngoriartornerani eqqugaanerat immikkut isigineqartariaqartutut saqqummiuppaa.

Ataatsimeersuarnermi nunarsuarmiunit tamanit peqataaffigineqartumi, nunatsinniit peqataasoqarneratigut nunatsinni soqutigisavut nunallu inoqqaavisa saqqumilaartinneqarnerat qulakkeerneqarpoq.

Nunatsinniit silap pissusaa pillugu COP15-ip nalaani isumaqatigiissutaasup 2020 tungaanut atuuttussap allanngortinneqarani ingerlaannarnissaa aallartitanit aamma qulakkeerneqarpoq.

”Nunatsinni silap pissusaanut tunngasutigut soqutigisatta Lykke Friis-ip oqalugiaataani ilanngunneqarnerat aammalu Naamminersorlutik Oqartussat Klima- & Energiministeriaqarfiullu akornanni suleqatigiilluarnerput naammagisimaarpara,” Naalakkersuisut Siulittaasuat Kuupik Kleist oqarpoq.

Kyoto-mi isumaqatigiissutip immikkoortuani siullermi (2008 – 2012) nunatta pisussaaffii pillugit oqaloqatigiinnerit ingerlalluarput, naatsorsuinerillu kingulliit takutippaat nunatta CO2-mik aniatitai malunnaatilimmik appariarsimasut. Tamanna CO2-mik aniatitsinermut aningaasartuutissatta ikileriarnerannik kinguneqassaaq.

www.climate-change.tv/kuupik-kleist-december-2010  naalakkersuisut siulittaasuata COP16-mi apersorneqarnera takuneqarsinnaavoq.