Royal Greenland aningaasaqarnermigut napparteqqinneqartariaqarpoq

Naak ingerlatseqatigiiffiup oqaluttuarisaanerani ukiumoortumik naatsorsuutit aatsaat taama ajortigigaluartut 30. september 2010 196 million koruuninik amigartooruteqartoqarmat, taamaattoq Naalakkersuisut Royal Greenlandip pisortaannut tatiginnipput. Pisortaasut ingerlatseqatigiiffissuup aningaasaqarneragut nappartitseqqinnissamut eqqissillutik sulisinneqassapput.

Ingerlatseqatigiiffissuup aningaasaqarnerata illorraata tungaanut saatikkiartorneqalernera erseriartulerpoq, tamanna ukiup naatsorsuusiorfiusup 2008/09-llu qaammataani sisamani kingullerni aammalu 2009/10-llu qaammataani pingasuni siullerni aningaasaqarnermi inissisimanerup takutippaa. Aningaasatigut inissisimaneq taama ineriartorsinnaasimavoq ilaatigut 250 million koruuninik immikkut tapiissuteqartoqarneragut kiisalu 250 million koruuninik juni 2009 attartortitsisoqarneragut.

Naalakkersuisut erseqqissaatigaat Royal Greenlandip pilertortumik namminersortunngorsaviginissaanut suli piffissanngorsimanngimmat. Ingerlatseqatigiiffiup aningaasaqarniarnera nukittorsartariaqarpoq pigisallu nalillit eqqanaarsarneqaqqaartariaqarput.

Naalakkersuisuttaaq ilisimatitsipput ingerlatseqatigiiffiup ineriartornera nangittumik qanimut malinnaaffigineqassasoq, qanimut attaveqatigiittarnertigut qaammatillu pingasukkaarlugit nalunaarusiatigut. Ingerlatseqatigiiffiup Naalakkersuisut peqatigalugit siunissami aggersumi anguniagassiissutiminik nalunaarusioqatigiinnikkut aalajangersaaffigineqarsimasunik angusaqarsinnaanissaa naatsorsuutigineqarpoq. Piffissami qaninnerusumi ungasinnerusumilu anguniagassiissutit matumani pineqarput, taamaalilluni ingerlatseqatigiiffiup ineriartornera ingerlatseqatigiiffimmut namminermut inuiaqatigiinnullu iluaqutaassammat.

Royal Greenland-imit suliat assigiinngitsut ingerlanneqartut Naalakkersuisuniit naliliiffigeqqeqqullugit eqqarsaatigeqquneqartut makkuupput:

• Pisuussutinik atorluaanissaq sulissutigineqassaaq. Pisuussutinik uumassusilinnik iluaquteqarnermi sinneruttunik eqqaasarneq annikinnerpaaffianiitinneqartariaqarpoq
• Royal Greenlandip angallatinut ingerlatseqatigiiffinnullu aningaasalersuisarnini nalileqqittariaqarpai kiisalu aalisarnerup aaqqissuuteqqinneqarnerani uummaarissumik peqataanissaa kaammattuutigineqarluni
• Royal Greenland nunatta immikkoortortaani inuussutissarsiornikkut piorsaanissat siunertaralugit piareersarnermi uummaarissumik peqataanissaanik kaammattorneqarpoq

Royal Greenlandip ukiumut naatsorsuutai 1. oktoberimiit 30. septemberip tungaanut ingerlasarput.

Ukiumut naatsorsuutit 30. september 2009-meersut takutippaat 196 millioner koruuninik amigartoortoqartoq. Ukiup siuliani ingerlatseqatigiiffik 78 millioner koruuninik amigartoorpoq. Ingerlatseqatigiiffik kingullermik sinneqartooruteqarpoq 2006/07-imi, taamanikkut sinneqartoorut 52 millioner koruuniummat.

Ingerlatseqatigiiffik piginnittunit juni 2009-mi 250 million koruuninik taperneqarpoq saniatigullu 250 million koruuninik taarsigassarsitinneqarluni. Tamanna ingerlatseqatigiiffiup aningaasaqarneranut iluaqusiivoq, taamaalilluni ingerlatseqatigiiffiup akiitsoqqittariaqalernissaa taamaaliorsimagaluarunilu ernianik akisuumik akilersuinissaa pinngitsoortinneqarmat.

Ukioq maanna naatsorsuutit takutippaat kaaviaartitat 4,7 milliarder koruuninut appariartut ukiuni siuliini kaaviiaartitat 5 milliard koruuniusarmata.

Oqalugiaat uani atuaruk