Silap pissusaa pillugu isumaqatigiissutissami Kalaallit Nunaat ilaatinneqarusuppoq

Kalaallit Nunaat isumaqatigiissutissami toqqaannartumik ilaatinneqarusuppoq, tassani Kalaallit Nunaata nammineerluni silap pissusaa pillugu politikkia anguniagaasalu ilaatinneqarnissaat qulakkeerusunneqarluni. Tamanna inaarutaasumi isumaqatigiissummi ilassutitut ersersinneqarsinnaasoq Naalakkersuisut Siulittaasuat Kuupik Kleist isumaqarpoq.

- Isumaqatigiissutissami anguniagassaq kusanarnerpaaq tassaasussaagaluarpoq nunat inerissimasut kiisalu ineriartortut akornanni inuuniarnikkut aningaasarsiornikkullu oqimaaqatigiissumik aaqqiissuteqarfigineqarnissaat. Piviusorsiornissaq piviusorsiunnginnissamiit pingaarneruvoq. Kalaallit Nunaata piviusorsiortumik anguniagaqarnissaa pingaarnerpaajuvoq, angusinnaanngisatsinnimmi siunnerfeqarsinnaanngilagut, Kuupik Kleist Kalaallit Nunaata silap pissusaa pillugu anguniagaanik saqqummiussereernerata kingorna Danmarkip pisortatigoortumik Kalaalllit Nunaata pimoorusivallaannginneranik naliliinera akissuteqarfigalugu oqaaseqarpoq.

Tamanna erserpoq unnukkiortornerani Kalaallit Nunaata København-imi sinniisoqarfiani Kalaallit Nunaata Savalimmiullu silap pissusaa pillugu politikkiminnik saqqummiussaqarnerinut atatillugu. Saqqummiussinerit oqallinnertallit Naalakkersuisut Siulittaasuanit  Kuupik Kleist-imit Savalimmiullu Avatangiisit pillugit Naalakkersuisuni ilaasortaanit Annika Olsen-imit ingerlanneqarput.

Kuupik Kleist-ip Annika Olsen-illu isumaqatigiissutigaat Naalagaaffeqatigiit ilaasortaasa kissaatigigaat erseqqissumik paasissallugu silap pissusaa pillugu isumaqatigiissutissaq atsioqatigiissutigineqassappat Naalagaaffeqatigiinnerup iluani nunat ilaasut qanoq pituttoqarneqassanersut.

- Kalaallit Nunaata Savalimmiullu isumaqatigiissutissami ilaatinneqarnissaat inatsisitigut aporfissaqanngitsutut isigaarput, Kuupik Kleist Annika Olsen-ilu isumaqatigiillutik naggasiipput.