Kalaallit Nunaata COP 15-imi akisuanera

Nunarsuarmi ilisimatusartartut nuimanerit marluk professor Dorthe Dahl-Jensen kiisalu Doktor Robert Correl, ilisimatusarnernit inernerit imaqarniliornerat taaguuserneqarsimasut ”The Greenland Ice Sheet in a Changing Climate” saqqummiuppaat.

- Naatsorsuusiornerit aallaavigalugit pisussatut ilimagisat tutsuiginaateqartut aarleqquteqartoqarnissaanik peqqutissaqartoq takutippaat – matumani aarleqqutigineqarsinnaalluni sermersuup unitsinneqarsinnaanngitsumik aakkiartulernissaa tamatumalu kingunerisaanik imarsuit qaffannissaat. Uagut kinguaariit tamatuma allanngortinneqarsinnaaneranik aalajangiisuusinnaanerput eqqarsaatigalu maani Københavnimi isumaqatigiittoqarnissaata pingaarutaanik eqqaasippaatigut, Naalakkersuisut Siulittaasuat Kuupik Kleist oqalugiarnermini ilaatigut taama oqaaseqarpoq.

Kuupik Kleist ullumi immikkut aaqqissuussisoqarnerani pingaarnertut oqalugiartitaasunut ilaavoq Danmarkip nunanut allanut ministeria, Per Stig Møller, Norgep nunanut allanut ministeria, Jonas Gahr-Støre, professor Dorthe Dahl-Jensen, doktor Robert Correl, USA-p præsidentiata tullersortigisimasaa, Al Core, FN-p silap pissussaa pillugu oqaaseqartitaa, Gro Harlem Brundtland kiisalu Danmarkip silap pissusaa pillugu ministeria, Lykke Friis, saqqummeeqatigalugit.

Inersuaq nunarsuarmi tamaneersunik 500-t sinnerlugit tusarnaariartulik siutsersimaartutut ilerpoq Naalakkersuisut Siulittaasuat Kuupik Kleist oqalugiassalluni qaqimmat. Oqaaseqarnermini Kuupik Kleistip nunarsuarmiunut erseqqissisilluinnarpai Kalaallit Nunaata unammilligassai – tassa aningaasarsiornikkut ineriartorusussuseqarneq, kisiannili silap pissusaata allanngoriartorneranut piviusorsiortumik aallaaveqarluni akisussaaqataaneq.

- Taamaakkaluartoq inuiaqatigiit kalaallit nutaanngoriartorfiusumi inuusuupputtaaq siunissamut sillimmartaartussat – siunissarput qularnaarniarlugu inuusuttatta ilinniagarluarsimasuunissaat qulakkeertariaqarparput, peqqinnissaqarfik pitsanngorsartariaqarparput, illussaqarniarneq pitsanngorsaavigisariaqarparput immitsinnullu nappannerulerniarluta inuussutissarsiornikkut ineriartortitsisariaqarpugut. Tamakku tamaasa akissaqarfiginiarlugit aningaasaqarnerput patajaallisartariaqarparput inuussutissarsiutinillu nutaanik pilersitsilluta, Kuupik Kleist ilaatigut taama oqarpoq.

Saqqummiussereernerit kingorna nunarsuarmi tamaneersunut tusagassiortunut katersortitsisoqarnerani Danmarkip nunanut allanut ministeriata, Per Stig Møllerip, Kalaallit Nunaata inissisimaneranut paasinninnini toqqortunngilaa.

- Kalaallit Nunaata pissusissamisoortumik ineriartorusussuseqarnera oqimaaqatigiissumik ingerlanniarneqartariaqarpoq, ineriartornerli piujuartitsinermik tunngaveqartumik ingerlanneqartariaqarpoq, Per Stig Møller ilaatigut taama oqaaseqarpoq.

Kuupik Kleistip aammaarluni tusagassiortunut nunarsuarmioqatigiinnut erseqqissaatigivaa Issittumi nannut kisimik uumasuunngimmata, inoqarmalli nunarsuarmioqatigiit allat taamaasa assigalugit pisariaqartitalinnik, sinnattulinnik siunissamullu neriuuteqarluartunik.