Ataqatigiinneq naligiinnerlu qitiutillugit Naalakkersuisooqatigiilersut

Naalakkersuisooqatigiilersut Inuit Ataqatigiit, Kattusseqatigiit Demokraatillu Naalakkersuisooqatigiinnissamut isumaqatigiissutaat taama takorluugaqarnermik aallartippoq. Isumaqatigiissutissaq ullaap tungaa tusagassiortunik katersortitsinermi atsioqatigiissutigineqarpoq.

- Suleqatigiissutissaq pingaarnertutut anguniarusutatta sinaakkutaatut isigineqartariaqarpoq, suliassarlu tullinnguuttoq tassaavoq suliassat erseqqinnerusumik allattorneqarnissaat – qanoq suliarineqarnissaat aammalu aningaasalersorneqarnissaasa allattorneqarnissaat tullinnguuppoq. Tamanna piffissami aggersumi suliarineqassaaq, Naalakkersuisunngortussani siulittaasussaq Kuupik Kleist, Inuit Ataqatigiit, nassuiaavoq.

Suleqatigiissutissami atsioqatigiissutigineqartumi Naalakkersuisooqatigiilersut naleqartitat suunerinik naqissusiillutik aallartipput, matumani ”suut tamarmik imminnut ataqatigiinnerannik” eqqarsariaaseqarnermik pingaartitsinissaq erseqqissaatigineqarluni.

Namminersorneq pilersinneqassaaq aqutseriaaseq nunatsinnit inuinillu aallaaveqartoq taakkunanngalu tulluussagaasoq aallaavigalu. Akisussaaffiit danskit naalagaaffiani tiguneqartussat siulliit tulleriinneri imaapput:

• Aatsitassarsiorneq pisuussutillu uumaatsut
• Nunanut allamiunut tunngasut pillugit oqartussaaffik
• Inuussutissanut aamma uumasut nakorsaqarnermut tunngasut

Naalakkersuisut tallimangorpat ivertereeriarunik pissutsit assigiinngitsut misissuiffigineqartussatut taakkartugaat makkuupput:

• Nunatta karsiata imaasa sunut atorneqarnerat iternga tikillugu ilisimaqqissaarneqarnissaa
• Aningaasanut Inatsimmi aningaasartuuteqarfiusut misissoqqissaarnissaat
• Akileraarutit akitsuutillu misissoqqissaarnissaat
• Akileraartarnerup tamakkiissumik qaqilerilluni isumalioqatigiissitamik pilersitsinikkut misissuiffigineqarnissaa
• ”Umiarsualiviup akitsuusersuiffiunngitsup” pilersinneqarsinnaanera
• Isumaginninnermi aaqqissuussinerup qaqilerneqarnissaa – matumani isumaginninnermi pissutsinut attuumassuteqartut ataqatigiissullu tamarmik pineqarlutik
• Inissaaleqisut angerlarsimaffeqanngitsullu atugaasa misissorneqarnissaat
• Nunatta inuussutissatigut imminut pilersorsinnaanerata qanoq iliorluni annertusarneqarsinnaanera misissorneqassaaq
• Nunatsinni aalisakkanik tunitsiveqarneq sukumiisumik misissuiffigineqassaaq

Naalakkersuisooqatigiilernissami isumaqatigiissummi Naalakkersuisut suliassaqarfinnut tamanut angorusutaat atuarneqarsinnaapput, immikkullu taasariaqarpoq Naalakkersuisunngortussat inissianik attartortitassanik annertunerusumik sanaartortitserusunnerat naqissuserneqarmat.

Meeqqat inuusuttullu atugaasa pitsaanerulersinneqarnissaat anguniarlugu immikkorluinnaq aamma iliuuseqartoqarnissaa anguniarneqarpoq.

Silap allanngoriartornerata malitsigisaasa inuttaasunit tamanit peqataaffigineqartumik iliuuseqarfigineqarnissaa anguniarlugu qaammarsaasoqarnissaa anguniarneqassaaq.

”Pilersugaanermiit imminut pilersugarinermut” taallugu nuna tamakkerlugu iliuusissat pilersaarusiorneqassapput, matumani sulisinnaasut tamarmik nunatsinni Namminersulersumi iluaqutigineqalernissaat anguniarneqassalluni.

Nutaatut aamma Naalakkersuisunngortussat pilersikkumavaat aalisakkanik qalerualinnillu pisassiisartussat politikkimut attuumassuteqanngitsut.

Tamatumalu saniatigut piniartuunerup nunarsuarmioqatigiinnit akuerineqarnissaa anguniarlugu sukumiisumik paasititsiniaasoqarnisaa Naalakkersuisunngortussat siunniuppaat.