2012-imut siumoortumik nalunaarsuineq

2012-imut siumoortumik nalunaarsuinermi immersugassaq una toorlugu  saqqummersiguk.

2012-imut skattekortimik eqqortumik pissaguit, piffissanngorpoq siumoortumik nalunaarsuinermik allattuiffissamik immersuinissannut.

Akileraaruseriffiup 2010-mut aamma 2011-mut paasissutissat nalunaarsorneqarsimasut tunngavigalugit siumoortumik nalunaarsuineq ingerlatissavaa.

2012-imut siumoortumik nammineerlutit nalunaarsuiniaruit allattuiffissatut immersugassamik ukunani aallersinnaavutit:

• Akileraaruseriffimmut
• Kommunip allaffianut imaluunniit nunaqarfinni allaffimmut
• Nittartagaq www.aka.gl

Siumoortumik nalunaarsuiffik piaartumik kingusinnerpaamillu 15. november 2011 akileraaruseriffimmut nassiunneqassaaq.

Inuit 2012-imut siumoortumik nalunaarsuiffimmik tunniussisussat makkuugajupput:

• Aningaasarsiat B-t akileraarutitaqanngitsut sinnerlugit B-nik aningaasarsiaqartut, imaluunniit
• Ilanngaat aalajangersimasoq sinnerlugu annertussusilinnik ilanngaatigineqarsinnaasunik
  ilanngaatissaqartut
• Namminersorlutik inuussutissarsiuteqartut, akileraarutit B-nik naatsorsuiffigineqartussat imaluunniit tunisinermi allagartaliuuneqartussat

Aappariinnut katissimasunut malugeqquneqarpoq aappariinnik ataatsimut akileraarusiisarneq atorunnaarnikuummat.
Tamanna isumaqarpoq aappariit katissimasut tamarmik immikkut siumoortumik nalunaarsuiffimmik immersuissammata.

2010-mut akileraarutissat sinnerinut akiligassat siumoortumik nalunaarsuinermut ilanngunneqarneri

2010-mut inaarummik naatsorsuut malillugu akileraarutissat sinnerinut akiligassaqaleruit, Akileraartarnermut Aqutsisoqarfiup akiligassatit, tapiliussassaq 6% ilanngullugu, 18.000 koruunit sinnersimanngippagit, taava akiligassat siumoortumik nalunaarsortinninni ilanngullugit naatsorsuutigiumaarpai.

Tamanna isumaqarpoq 2010-mut akileraarutissat sinnerinut akiligassatit (annerpaamik 18.000 koruunit) tunngaviusumik akileraartarnermut ilanngaatissannit ilanngaatigineqarumaartut.

Akileraarutissat sinnerinut akiligassatit 2012-imut siumoortumik nalunaarusiorneqarninnut ilanngullugit naatsorsuutigitikkusunngikkukkit, tamanna pinngitsoortissinnaavat naatsorsuullugu ilanngunneqartup annertoqataanik Akileraartarnermut Aqutsisoqarfiup GrønlandsBanken A/S-imi kontuanut 6471-1002608 kingusinnerpaamik 20. november 2011-mi akiliuteqarnikkut. Eqqaamajuk akiliutip sumut tunngasuunerata nalunaarutiginissaa, assersuutigalugu ”inuup normua xxxxxx-xxxx, 2010-mut akileraarutissat sinnerinut akiligassat naatsorsuunneqartut”.

2012-mut skattekortissat december 2010-p ingerlanerani tigunissaa naatsorsuutigisinnaavat.

Eqqortunik tunngaveqarluni siumoortumik nalunaarsuinerup ukiumi aningaasarsiorfiusumi 2012-imi
eqqortunik akileraaruteqartinneqarnissat qulakkiisavaa.

www.aka.gl -ikkut siumoortumik nalunaarsuineq

Akileraartarnermut Aqutsisoqarfik 2012-imut siumoortumik nalunaarsuinermi paasissutissanut allannguutigitinniakkannik nittartakkakkut nalunaaruteqarsinnaanngorninnik periarfissiivoq. Tamanna pisinnaavoq Akileraartarnermut Aqutsisoqarfiup nittartagaatigut, www.aka.gl.

2012-imut siumoortumik nalunaarsuinermi immersugassamik naqeriikkamik tigusaqarsimanngikkuit, akileraaruseriffimmut saaffiginninnikkut pissarsiarisinnaavat, immersuiffissamilu tassani nammineq toortaalluni aaqqiinermi isissutissaq allassimassaaq.

Paasissutissat annertunerusut www.aka.gl-imi alakkakkit.

Siumoortumik nalunaarsuiffimmik tunniussineq

Siumoortumik nalunaarsuiffiit akileraaruseriffigisannut tunniussinnaavat. Tamanna ima pisinnaavoq:

• Allakkerivikkut nassiussinikkut
• Faxikkut
• E-mailikkullu (immersugaq atsiugaq qarasaasiatigut assileriarlugu ilanngullugu nassiullugu)
• www.aka.gl -ikkut