Piginnaasat ineriartortinnissaat pillugu siunnersuisoqatigiit

Inuussutissarsiornermut Piginnaanngorsaanermullu Siunnersuisoqatigiit (IPS)

Siunnersuisoqatigiit 2008-mi upernaaq Naalakkersuisunit pilersinneqarput, siunertaralugulu suliani suliffeqarnermut inuussutissarsiutinullu tunngasuni piginnaanngorsaanermut tunngasuni Naalakkersuisunut siunnersuinissaq, kiisalu inuussutissarsiutinut tunngasuni piginnaanngorsaanermut suliniutit ataqatigiissarneqarneri pitsaanerulersissallugit.

Siunnersuisoqatigiit pillugit inatsisitigut tunngavik 1999-imi Naalakkersuisunit pilersinneqarpoq, siunnersuisoqatigiilli maannakkut ilusaat, ataani taagorneqartunik imaqartoq, 2008-imeersuulluni. Siunnersuisoqatigiit minnerpaamik ukiumut sisamariarlutik ataatsimiittassapput immikkoortumilu suliani ineriartornerlu pillugit ukiumoortumik nalunaarusiani aprilip aallaqqaataani kingusinnerpaamik tunniuttassallugu.

• Suliani Naalakkersuisunut saqqummiunneqartuni siunnersuisoqatigiit suliaqarlutillu inassuteqartassapput
• Siunnersuisoqatigiit nammineq iliuuseqarnermikkut sulianik naleqquttorisaminnik suliaqarsinnaapput
• Siunnersuisoqatigiit inassuteqarnerminni ajornartorsiutinik atuuttunik misissueqqissaarnissamut uppernarsaanissamullu pisariaqartitsisinerit tikkuarsinnaavaat, tassunga ilanngullugu illoqarfinni nunallu immikkoortuini ajornartorsiutit.

Tassunga ilanngullugu siunnersuisoqatigiit:

• Inuussutissarsiutinik siuarsaanermi, suliffeqarnermut inuussutissarsiutinullu ilinniartitaanermi suliniutinut tunngasutigut suliffeqarnermi illuatungeriit akornanni aaqqissuusseqatigiinnissap aamma ataqatigiinnissap qularnaarneqarnissaanut peqataassapput.

· Suliffeqarnerup eqaatsunngorlugu ineriartortinneratigut inuussutissarsiornermik uummaarinnerusumik pilersitsinissamut tunngavissanik pilersitsinissaq anguniassallugu, kiisalu immikkut ilisimasaqarnissamut nalinginnaasutigullu piginnaanngorsarnissap qularnaarneqarnissaa sulissutigissallugu.

· Suliffeqarnermi ilinniartitaanermilu siuniussami qanittumi kiisalu siunissami ungasinnerusumi piginnaanngorsaanissamut pisariaqartitsinerit naammassineqarnissaat anguniassallugu.

· Suliffeqarnermi illuatungeriit pisortallu piginnaanngorsaanermi aningaasaliinissamut kajumissuseqalersillugit inatsisitigut suliniuteqarnissamut aaqqissuussinissamullu siunnersuuteqartarnissaq.

· Siunnersuisarnikkut naleqquttunik suliniuteqarnikkut inuuneq naallugu ilikkariartortarnerup aalajangersimasumik imaqalersissinnissaa anguniassallugu.

· Nunatsinni inuussutissarsiutitigut ineriartorneq, inuussutissarsiutinut ilinniartitaaneq sulffeqarnikkullu suliniutit malinnaaffigalugit aamma inuussutissarsiutitigut ineriartornermut kissaatigineqartumut toqqammavitsigut atukkat pitsaanerulernissaannut aqqutissiuussillutik.

· Inuussutissarsiutitigut ilinniartitaanerni ineriartorneq malinnaaffigalugu aamma ilinniartitaanerit pitsaassusaat ineriartornerallu, kiisalu allanngortitsisinnaassuseq ataqatigiinnerillu pillugit kaammattuuteqarnissaq.

· Pikkorissarnerit, piginnaanngorsaanerit inuussutissarsiutinillu siuarsaanerit pillugit suliniutinik ingerlaavartumik nakkutilliinermi siunnersuineq tapertaanerlu.

· Ilinniarfinni aamma suliffeqarnermi inuussutissarsiutitigullu siuarsaanermi suliniuteqarnikkut nutaaliornerup aallarnisaasarnerullu nukittorsarnissaannut aaqqiissutissatigut peqataaneq.

· Illoqarfinni nunallu immikkoortuini ingerlatseqataasut oqaloqatiginerisigut illoqarfinni nunallu immikkoortuini inuussutissarsiutitigut iniartortitsinermi, suliffeqarnermi aamma inuussutissarsiutinut ilinniartitaanermi suliniutit aaqqissuussaanerannut siunnersuuteqartarneq.

Siunnersuisoqatigiit siulittaasuat Naalakkersuisunit toqqarneqassaaq. Tamatuma saniatigut IPS ukuninnga sinniisoqarpoq:

· NUSUKA.

· Kalaallit Nunaanni Sulisitsisut Peqatigiiffiat (GA).

· ILIK.

· Sulinermik Inuutissarsiuteqartut Katuffiat (SIK).

· KANUKOKA (majip aallaqqaataani 2008-imi ikaarsaarnermut ataatsimiititaliat pilersinneqarnisaasa tungaannut, tamatuma kingorna kommunerujussuit sisamanit tamanit sinniisoq ataaseq (+IMMAQALU: KANUKOKA?)).

· Teknikikkut ilinniarfiniit ilaasortaq ataaseq (Sanaartornermut aamma Saviminilerinermut Ilinniarfik).

· Inuussutissalerinermut ilinniarfinniit ilaasortaq ataaseq (ATI aamma INUILI).

· Niuernermit, Sullissinermit, Aqutsinermit aamma IT-mit ilaasortaq ataaseq (Niuernermut Ilinniarfiit).

· Takornariartitsinermit misigisaqartitsinerniillu ilaasortaq ataaseq.

· Teknikikkut Siunnersuisartut Peqatigiiffiannit ilaasortaq ataaseq.

Siunnersuisoqatigiit oqartussanit ukunannga tamanit aalajangersumik aggersagaqartassaaq:

· Aningaaserivinniit.

· Nunatsinni Takornariartitsinermut Inuussutissarsiornermullu Siunnersuisoqatigiit.

· Greenland Venture.

· Naatsorsueqqissaartarfik.

· Inuussutissarsiornermut, Suliffeqarnermut Inuussutissarsiutinullu ilinniartitaanernut Naalakkersuisoqarfik

Siunnersuisoqatigiinni ilaasortat ukiunut sisamanut toqqarneqartassapput.

Siunnersuisoqatigiit iluminni siulittaasup tullissaanik toqqaassapput. Siulittaasup peqannginnerani siulittaasup tulliata siunnersuisoqatigiit ataatsimiinnerat aquttassavai.

Inuussutissarsiornermut, Suliffeqarnermut Inuussutissarsiutinullu ilinniartitaanernut Naalakkersuisoqarfik IPS-imut allattoqarfiuvoq.