Ilinniartitaanermut pilersaarut – Siunissaq pilersiguk!

Nuna tamakkerlugu ilinniartitaanermut pilersaarut Naalakkersuisut Inatsisartullu 2006-imi akueraat, tassani anguniagaalluni sulisut 2/3-ii 2020-mi piginnaasaqalerfiusumik ilinniagaqassasut.

Nunatsinni sulisut 1/3-iinnaat maanna piginnaasaqalerfiusumik ilinniagaqarput. Ilinniartitaanermut pilersaarummi anguniagaq naatsumik oqaatigalugu tassaavoq sulisut nunatsinni suliffeqarfinni maanna siunissamilu pisariaqartitsinernut naleqqussarnissaat. Nunarput periarfissarpassuarnik allanngorfissarpassuarnillu naapitassaqarpoq, - taakkulu nunatsinnit atorluarneqassapput.

Suliniuteqarfiit

Ilinniartitaanermut pilersaarummi suliniuteqarfiit inuussutissarsiutinut ineriartortunut tunngatinneqarput. Tassa: Sanaartorneq, aatsitassarsiorneq, takornariartitsineq isumaginninnermullu tunngasut tamarmik, aamma ilinniarsimasunik sulisussaaleqiffioqisut.

Immikkoortut sammineqartullu

Ilinniartitaanermut pilersaarutip immikkoortuani siullermi 2006-2012-imut atuuttumi pineqartumut marluk makku sammineqarput:

Ilinniarsimanngitsut suliffissaaleqilersinnaasut imaluunniit isititamikkut nikerarsinnaasut.

Immikkoortup aappaani 2012-2020-imut atuuttussami sammineqartut aamma ilinniartitaanernik ingerlaqqiffiusunik ilaneqassapput, soorlu ilinniartitsisunik, politiinik, ilisimatusarfinni ilinniartitaanernik il.il. Tamatumanili inuusuttut ilinniagaqalernissamut piareersarfiusumik ilinniaqqaarnissaat piumasaqaataavoq.

Piginnittuuneq

Ilinniartitaanermut pilersaarut ilaatigut nalunaarusiaq ”Ilinniartitaanikkut piginnaasanillu ineriartortitsinikkut siuarsaaneq” tunuliaqutaralugu 2005-ip ingerlanerani suliarineqarpoq. Tamatuma kingorna taanna Naalakkersuisunit Inatsisartunut saqqummiunneqarpoq 2006-imi upernaakkut isumaqataaffigineqartumik. Taamaattumik ilinniartitaanermut pilersaarut katiterneqarpoq ataatsimut suliassanngorlugu ilaatigut Piginnaasat ineriartortinnissaat pillugu Siunnersuisoqatigiinnit, KANUKOKA-mit Namminersornerullutik Oqartussanilu pisortaqarfippassuarnit peqataasunit qanimut malinnaaffigineqartumik.

Aaqqissugaaneq

Ilinniartitaanermut pilersaarummut ulluinnarni allattoqarfik Inuussutissarsinermik Suliffeqarnermut Inuussutissarsiutinullu Ilinniartitaanermut aqutsisoqarfimmiiippoq (ISIIA). Tamatuma saniatigut aqutsisoqatigiinnik pilersitsisoqarsimavoq pisortaqarfinni peqataasuni pisortanik KANUKOKA-milu pisortanik sinniisoqarfiusunik.

Aningaasalersuineq

Ilinniartitaanermut pilersaarut Namminersornerullutik Oqartussani pineqartuni allani sipaarniarnikkut, kiisalu EU-mik suleqateqarnissamik isumaqatigiissummit danskillu naalagaaffiannit missingersuutinit tapiissutinik aningaasalersorneqarpoq.

 

Ilinniartitaanermik siunertaq kiisalu nalunaarutit

Ilinniartitaanermik siunertaq kiisalu nalunaarutit