Rio+20-mi isumasioqatiginneq: Nunani avannarlerni nerisat

Isumasioqatigiissitsinermi apeqqut sammineqartoq tassaavoq; isorliunerusuni aningaasarsiornikkut ineriartorneq inuussutissanik piujuaannartitsinermik tunngaveqarluni pilersuinissamut qanoq iliorluta tunngaviutissavarput? Nunat Avannarlerni Ministerit Siunnersuisoqatigiivisa isumasioqatigiissitsinerminnut siunertaraat; peqataasut nunanit tamalaaneersut namminneq nunaminni misilitakkatik aallaavigalugit oqalliseqataanissaat ilisimasanillu paarlaasseqatigiinnissaat, nunat avannarliit akornanniinnaanngitsoq aammali nunat peqataasut tamat akornanni. Neriuutigineqarpoq isumasioqatigiinneq suleqatigiinnernik arlalinnut malitseqarsinnaajumaartoq. Nunani assigiinnitsuni inuussutissarsiornerup aamma inuussutissarsiornikkut ineriartortitsinermi isumassarsiat periutsillu assigiinngitsut piujuaannartitsinermik tunngaveqartut oqalugiartunit saqqummiunneqaqattaarput. Nunarput sinnerlugu saqqummiussisuuvoq Ilinniartitaanermut Ilisimatusarnermut Nunanullu Avannarlernut Tunngasunut Naalakkersuisoq Palle Christiansen. Nunatsinni inuussutissaqarniarnerup piujuaannartitsinermik tunngaveqarluni ingerlanneqarnera oqalugiarnermini qitiutillugu oqaluttuaraa.

Oqalugiartut ilaata nerisassiornermik ilisimatuup igasutullu ilinniagaqarsimasup Danmarkimeersup Trine Hahnemannip oqaluttuaraa, nunarsuarmi massakkutut pisuussutinik uumassusilinnik atuipilunneq allanngortinnagu iliuuseqarfiginagulu ingerlaannassappat, taava siunissami nerisassaqarniarnitta allanngortittariaqalerneranik tamanna nassataqarsinnaasoq, allaat nerisatsinni naatitat 80 procentinngortariaqarnerannik neqitukkallu 20 procentiinnanngortariaqarnerannik kinguneqarluni.

Tamanna issittumi inuusut eqqarsaatigalugit ajornarluinnassasoq Palle Christiansenip erseqqissaatigaa, issittormiut nerisaasa annerpaartaat neqineersuummata. Taamaattumik issittumi naatitanik naatitsiffigiuminaatsumi najugaqartut neqitortuunerunerisa neqinillu pisariaqartitsiuartuunerisa illuatungaani aamma paasineqartariaqalernerat tikkuarpaa.

Palle Christiansen Nunat Avannarlerni Ministerit Siunnersuioqatigiiffiata Nunani Avannarlerni nerisaqarneq aningaasarsiornikkullu nutaaliornerit pillugit isumasioqatigiissitsinerani oqalugiareermat apersorpat. Apersuineq qallunaatut pivoq apersorneqartoq qallunaatut oqaaseqartuummat. Palle Christiansenip qallunaatut apersorneqarnerata kalaallisuunngortinnera kingusinnerusukkut nittartakkami atuarneqarsinnaalissaaq. Isumasioqatigiissitsinerup siunertaa qallunaatut siullermik ima nassuiarpaa:

 Nipitaa uani tusaruk 

 Pallep tuluttut oqalugiarnerata nipitaa

 Assitai takukkit