Atorfiit

Tikilluarit!!

Peter Schultzimik ateqarpunga, Naalakkersuisullu Siulittaasuata Naalakkersuisoqarfiani Naalakkersuisoqarfimmi Pisortaallunga.
Tassa politikerit Namminersorlutik Oqartussallu akornanni qullersaallunga attaveqaataavunga.
Ataatsimut suliffeqarfigilerumaagassarigunakkatsinnut soqutiginninnerit nuannaarutigaara, neriuppungalu nittartagaq manna atorlugu alapernaaserusussutsit naammatsillugu alapernaasissasutit, apeqqutissaqassagunaravillu taakkua akissutissaasa ilaat akissutissarsissagitit.
 

Naatsumik oqaatigalugu Kalaallit Nunaanni Namminersornerullutik Oqartussat Qitiusumik Allattoqarfiat sullivinnik arlalinnik siammartersimasunut agguataagaavoq.
Qitiusumik Allattoqarfik, QA-mik naalisakkajuttagarput, 600-t missaannik sulisoqarpoq, taakkua naalakkersuisoqarfinnut qulingiluanut aqutsisoqarfinnullu arlalinnut agguataarsimapput.
QA aaqqissugaanikkut politikkikkut aqunneqarpoq.
Taamaattumik politikkikkut aalajangiinerit, Naalakkersuisunit Inatsisartunillu aalajangerneqartut ulluinnarni sulinitsinnut sunniuteqarput.

Qitiusumik Allattoqarfimmi suliassarput pingaarnerpaaq tassaavoq, Naalakkersuisut aalajangernissaannut tutsuiginartumik tunngavissinnissaat aalajangikkallu piviusunngortinnissaat.
Taakkua saniatigut kissaatigaarput, pisortat sullissineranni innuttaasunik qanimut suleqateqarnissap sanarfinerani siuttuunissarput.

Naak ulluinnarni naalakkersuisoqarfinni aqutsisoqarfinnilu sulinerput assigiinngitsorujussuugaluartoq, suliffeqarfik ataaseq ataatsimik anguniagalik suliffigaarput, tassalu tamatta innuttaasunut Kalaallit Nunaannullu sunniuteqarusuppugut.

Inussiarnersumik inuulluaqqusillunga

Peter Schultz