London Mining Greenland A/S-ip misissueqqaarnissamut pisinnaatitaaneranut 2009/16-imut (Isua) tamanut ammasumik tusarniaaneq

London Mining Greenland A/S misissueqqissarnissaminut akuersissut nr. 2009/16-imut Qussuup qinnguaniit qummut Kuussuup tungaanut ingerlanneqarnissaat siunertaralugugu suliniutissanut assigiinngitsunut akersissummik qinnuteqarsimavoq*. Nunaminertaq pineqartoq Nuummiit kangimut avannamut 80 km miss. ungasissuseqarpoq. Suliniutissatut qinnutigineqartut misissueqqaarnermut atatatillugit isumagineqartussatut kissaatigineqarput. Taamatullu Isuata killingani saviminissanik piiaaffissap aallartinnissaanut maannamut qinnuteqartoqarsimanngilaq.

Suliniutissat qinnutigineqartut maannakkut tusarniaanissamut saqqummiunneqartut akuerineqassagaluarpata kingusinnerukkut piianissamut suut tunngavigalugit akuersissuteqartoqarsinnaaneranut sunniuteqartussaassanngilaq. Kingusinnerusukkut piiaanissamut qinnuteqartoqassappat qinnuteqaammut tunngasut taamatuttaaq tamanut ammasumik tusarniaanermi saqqummiunneqarumaarput.

Suliniutissatut qinnuteqaatigineqartuni najugaqarfigiitigalugit suliffissat pingasut qitiutinneqarput, tamarmik immikkut inunnut 80-it miss. inissaqartitsisussat. Taakkuninnga sanaartornissamut peqataatillugu sulinermut atatillugu aqqusernit 40 km miss. isorartussuseqartut, ujaqqerivissamik pilersitsinissaq, toqqorsiviliornissaq ikummatissanillu inissiivissaq, kiisalu Kuussua ikaarlugu ikaartarfissamik110 m-imik takissusilimmik pilersitsinissaq ilaapput. Suliniutit pineqartut arlaatigut siunissami piiaanissamik qinnuteqarnissamut qaffasinnerusumilu sanaartorsinnaanissamut atatillugu avatangiisinut nunallu sananeqaataanik misissuinissanut London Mining-imut oqilisaataasussaapput. Tamassuma saniatigut savimineqarfiup eqqaani pisuussutinik qillerinissat eqqarsaatigalugit piareersaanissaq aqutsinissarlu pitsanngorsarneqarsinnaassallutik.

London Mining Greenland A/S akuersissummik tunineqassappat suliniutit aallartitsinnagit nunaminertap pissutsimigut iluseqalerseqqinnissaanut aningaasanik sillimmatigisassanik akileeqqaartussaavoq. Aningaasat pineqartut ilaatigut ima pisoqartillugu akilerneqassapput: Inaarutaasumik pilersaarut naalakkersuinikkut akuerineqarsinnaanngippat piiaanissap aallartinngitsoornerani, imaluunniit suliffeqarfiup iluani arlaatigut aningaasaqarnikkut ajornartorsiortoqalissagaluarpat.

Qinnuteqaat ilanngunneqartoq ”Evaluation of Environmental and Socio-economic Impacts for the construction of 3 camps and associated works” (“Najugaqarfigiitigalugit suliffissat pingasut tassungalu atatillugu suliassat pillugit avatangiisitigut inuiaqatigiillu aningaasaqarnerisigut naliliinerit”) aamma ilanngussaq teknik-imut tunngasoq ”Reference Document for the construction of 3 camps and associated facilities” (“Najugaqarfigiitigalugit suliffissat pingasut tassungalu atatillugu suliassat pillugit innersuutigisat allattorsimaffiat”) pillugit oqaaseriumasat kingusinnerpaamik 7. marts 2012 Aatsitassanut Ikummatissanullu Pisortaqarfimmut (bmp@nanoq.gl) nassiunneqareersimassapput.

Naalisagaq teknik-imut attuumassuteqanngitsoq danskisut naqitaq aamma tuluttut kalaallisullu pigineqarpoq, tassanilu qaavatigut naalisagaq teknik-imut attuumassuteqanngitsoq tuluttut kalaallisullu naqitaq nassaarineqarsinnaalluni.

Najugaqarfigiitigalugit suliffissat pingasut suliassallu tassunga attuumassuteqartut sunniutigisinnaasaannik nalilersuinerit (kalaallisut) 

Najugaqarfigiitigalugit suliffissat pingasut tassungalu atatillugu suliassat pillugit qinnuteqaammi innersuussutigisat allattorsimaffiat (kalaallisut) 

Nationalt Center for Miljø og Energi-mit oqaaseqaat (kalaallisut) 

 *) London Mining Greenland A/S misissueqqaarnissamut akuersissutaasoq nr. 2009/16 annertusiniarlugu qinnuteqarpoq, tamatumuunalu suliassatut qinnuteqaatigineqartut aallartikkusunneqarlutik. Akuersissummi misissueqqaarfissap
annertusinissaanik qinnuteqaat maannakkut suliarineqarpoq, taamatullu naalakkersuinikkut maannamut akuerineqarsimanani.
Suliassatut qinnuteqaatit aallartinneqassappata misissueqqaarnissamut akuersissummi 2009/16-imi misissuiffissatut akuerineqartup annertusinissaa naalakkersuinikkut akuereqqaartariaqarpoq.