Peqqinnissaqarfiup aqunneqarnera, aaqqissuussaanera peqqinnissamullu tunngasutigut sulisut pillugit

Peqqissutsimut Naalakkersuisoqarfiup Peqqinnissaqarfiup aqunneqarnera, aaqqissuussaanera peqqinnissamullu tunngasutigut sulisut pillugit Inatsisartut inatsisissaattut siunnersuut tusarniutigalugu matumuuna nassiuppaa.

UPA2009/137-mi siunnersuutigineqarpoq Naalakkersuisut tarnip pissusaanik ilisimasallit pillugit inatsisissatut siunnersuummik, ilaatigut taaguutip illersugaanera, sulinissamut akuersissuteqartarneq, tarnillu pissusaanik ilisimasallit pisinnaatitaaffii pisussaaffiilu pillugit malittarisassat ilanngullugit saqqummiissasut. Peqqissutsimut Naalakkersuisoqarfik Inatsisartut oqaluuserinninnerat tunngavigalugu Kalaallit Nunaanni tarnip pissusaanik ilisimasallit sulinissaannut akuersissut pillugu inat­sisiliornissamut periarfissat pillugit nassuiaasiorpoq. Nassuiaat UPA2010-mi Inatsisartunut agguaanneqarpoq.

Nassuiaammi Peqqissutsimut Naalakkersuisoqarfiup kaammattuutigaa Kalaallit Nunaanni tarnip pissusaanik ilisimasallit sulinissaannut akuersissut pillugu inatsisissamik suliarinnittoqassanngitsoq. Tassani tunngavigineqarpoq napparsimasut pisinnaatitaaffiisa, tarnip pissusaanik ilisimasallit ilinniakkat tungaatigut tunuliaqutaasa aamma Kalaallit Nunaanni tarnip pissusaanik ilisimasallit sulinissaannut akuersissuteqartarnermi nakkutilliisoqartitsinermilu attuumassuteqannginnissap naammattumik qulakkeerneqarsinnaan­nginnerat.

Kalaallit Nunaanni tarnip pissusaanik ilisimasallit peqqinnissamullu tunngasutigut sulisut allat sulinissaannut akuersissut pillugu inatsimmut taarsiullugu Naalakkersuisut piginnaatinneqassapput peqqinnissamut tunngasutigut sulisunut malittarisassanik aalajangersaanissaminnut, taanna aalajangersakkanik imaattunik imaqarsinnaavoq, taaguutip illersorneqarnera, tarnip pissusaanik ilisimasallit pisussaaffii, napparsimasut pisinnaatitaaffii, nakkutilliineq il.il.

Inatsisissatut siunnersuutip kinguneraa peqqinnissamut tunngasutigut sulisut, Kalaallit Nunaanni sulinissamut akuerisaanngitsut, pillugit malittarisassanik aalajangersaanissamut Naalakkersuisut piginnaatinneqarnerat, assersuutigineqarput inuit tarnip pissusaanik ilisimasalittut, tagiartuisartutut, pillorissaasutut, juumuutut il.il., Danmarkimi sulinissamut akuerineqarsimasut, aamma peqqinnissamut tunngasutigut sulisut Danmarkimi Kalaallilluunniit Nunaanni sulinissamut akuerisaanngitsut, soorlu tarnip pissusaanik ilisimasallit Danmarkimi sulinissamut akuerisaanngitsut il.il. eqqarsaatigalugit. Piginnaatitsineq atuuppoq peqqinnissamut tunngasutigut sulisunut peqqinnissaqarfimmi, pisortat sulliffeqarfiutaanni namminersortunilu sulisuusunut.

Peqqinnissamut tunngasutigut sulisut peqqinnissaqarfimmiittut peqqinnissaqarfiullu avataaniittut pillugit maleruagassiornissamut Naalakkersuisut piginnaatinneqarnerisa kingunerisaanik inatsisissatut siunnersuummi siunnersuutigineqarpoq Nunatta Nakorsaaneqarfiata peqqinnissamut tunngasutigut sulisunik peqqinnissaqarfimmiittunik nakkutilliisuunera annertusineqassasoq peqqinnissamut tunngasutigut sulisunut suliffeqarfinnullu peqqinnissaqarfiup avataaniittunut aammattaaq atuutilersillugu.

Napparsimasut illersugaanerat napparsimasullu peqqinnissamut tunngasutigut sulisunit danskinit sulinissamut akuerisaasimasunit katsorsagaasut aamma peqqinnissamik tunngasutigut sulisunit danskinit sulinissamut akuerisaasimanngitsunit katsorsagaasut naammagittaalliuuteqarsinnaanerannut assigiimmik periarfissaqartitsinissaq qulakkeerumallugu siunnersuutigineqarpoq Nunatta Nakorsaanerata napparsimasut naammagittaalliuutaannik suliaqarnermi Peqqinnissaqarfiup Napparsimasut Sullinneqarneranni Maalaaruteqartarfiata suliassaasa avataaniittunik aalajangiisinnaatitaanera inatsisitigut aalajangersarneqassasoq.

Tamatuma saniatigut inatsisissatut siunnersuutip kinguneraa kommunini pinaveersaartitsinermut ataatsimiititaliaqarnerup allanngortinneqarnissaa. Inatsisartut peqqussutaanni atuuttumi takuneqarsinnaavoq kommuneni tamani najukkami pinaveersaartitsinermut ataatsimiititaliortoqassasoq. Kommunit aaqqissuuteqqinneqarneranni (ullumikkut sisamanik kommuneqarluni siusinnerusukkut kommunit 18-usimagaluartut) pisariaqarpoq qulakkiissallugu peqqissaanermik siuarsaalluni aamma pinaveersaartitsilluni sulinerit avatangiisini qanigisani suli ingerlanneqarsinnaanissaat. Inatsisissatut siunnersuutip kinguneraa Naalakkersuisut kommunini tamani qitiusunik pinaveersaartitsinermut ataatsimiititalianik pilersitsinissaat, kiisalu annertusisitsisoqassasoq imatut isikkulimmik, tassalu Naalakkersuisut taakku saniatigut najukkani pinaveersaartitsinermut ataatsimiititalianik kommunini pisariaqartitsineq naapertorlugu pilersitsisinnaalersillugit.

Inatsisissatut siunnersuummi aalajangersakkat allat oqaasertamikkut allanngortinneqanngillat. Aalajangersakkat ataasiakkaat oqaasertamikkut allanngortinneqarput oqaasertai erseqqinnerulersinniarlugit ullutsinnullu pissutsinut naleqqunnerulersinniarlugit. Tassunga ilanngullugu taaguut najukkani peqqinnissaqarfiit allanngortillugu taaguuserneqarpoq imaalillugu Peqqinnissaqarfinni Aqutsiviit. Allannguineq Peqqinnissaqarfiup iluarsartuuteqqinneqarneranut attuumassuteqarpoq, tassami najukkani peqqinnissaqarfinnut aggornilersuineq allanngortinneqarmat nunap immikkoortuini peqqinnissaqarfinnut aggornilersuininngortinneqarluni. Taaguutip Peqqinnissaqarfinni Aqutsiviit taarserpai najukkani peqqinnissaqarfiit aamma nunap immikkoortuini peqqinnissaqarfiit.

Taamatuma saniatigut inatsimmi aalajangersakkani Namminersorlutik Oqartussat kalaallisut taaguutaat, Peqqissutsikkut Nakkutilliisup aamma Peqqissutsikkut Nakkutilliisoqarfiup aammalu Peqqissutsimut Pisortaqarfiup taaguutaasa allanngortinneqarneri tunngavigalugit naqqissuisoqarpoq.

Naalakkersuisoqarfimmit inussiarnersumik kissaatigineqarpoq siunnersuummut oqaaseqaataajunnartut tiguneqarsimanissaat kingusinnerpaamik pingasunngornermi 7. juli 2010, nal. 12:00.

Naalakkersuisoqarfimmit KANUKOKA qinnuigineqassaaq tusarniaaneq kommuninut ingerlateqqeqqullugu. Taamatuttaaq Naalakkersuisoqarfiit qinnuigineqassapput tusarniaaneq aqutsisoqarfinnut suliffeqarfinnullu attuumassuteqartunut nassiuteqqullugu.

Oqaaseqaatit ataani atsiortumut mailikkut imaluunniit allakkatigut nalinginnaasutigut nassiuteqquneqarput.

Tusarniaavigineqartut pillugit takussutissaq nuutinninngorlugu ilanngunneqarpoq.

Inussiarnersumik inuulluaqqusilluta

Signe Svane

Toqq/direkte 346623

sisv@nanoq.gl