Meeqqanik pinerliisimannginnermut uppernarsaammik pissarsinissamut inatsisissaannut siunnersuut

Pinngitsoorani meeqqanik pinerliisimannginnermut uppernarsaammik pissarsinissamut Inatsisartut inatsisissaattut siunnersuummut tunngatillugu tusarniaaneq.

Matumunnga ilanngullugu meeqqanik pinerliisimannginnermut uppernarsaammik pinngitsoorani pissarsinissamut tunngatillugu Inatsartut inatsisissaannut siunnersuutip tusarniutigineqarnera nassiunneqarpoq. Peqqussutissatut siunnersuutip Inatsisartut 2010-mi upernaakkut ataatsimiinnissaani suliarineqarnissaanut saqqummiunneqarnissaa naatsorsuutigineqarpoq.

Erseqqissaatigineqassaaq tusarniutigineqartoq nassiuteqqitaammat, tassami siunnersuut siusinnerusukkut 13. juli 2009-miit ulloq 24. august 2009 ilanngullugu tusarniutigineqarnikooreermat. Siunnersuutip nutaamik tusarniutigalugu nassiuteqqineqarneranut pissutaavoq Justistministeriaqarfiup meeqqanik pinerliisimannginnermut uppernasaammut tunngatillugu siunnersuutip imarisai, tassalu meeqqanik pinerliisimannginnermut uppernarsaammik atuinisamut tunngatillugu tunngavigineqartussat tusarniaanermut piffissarititap qaangiunnerani aatsaat tigusimallugit nalunaarutigimmagu. Justistministeriaqarfiup nalunaaruteqarata pingaaruteqarneranut pissutaavoq Naalagaaffiup Polittivi ministeriarfimmi tassani inissisimasut tassarpiaammata meeqqanik pinerliisimannginnermut uppernarsaatinik tunniussaqartussaasut. Taamaattumillu meeqqanut pinerliisimannginnermut upparnarsaammik pissarsinissami piumasaqaatigineqartut Justistministeriaqarfiup oqaaseqaatai tunngavigalugit suliarineqarsimasut aammalumi siunnersuummut ilanngullugit suliarineqarsimasut sukumiisumik paasisaqarfigineqarnissaat qularnaassallugu aallaaviusimalluni.

Tamanna tunngavigalugu siunnersuutip tusarniaatigeqqillugu nassiuteqqinneqarnissaa pissusissamisoornerpaajusutut nalilersimavarput, naak assigiinngitsutigut annikitsutigut aaqqissuunneqarneratigullu allanngortinneqalaarsimagaluarluni siunnnersuutip tusarniaassutigineqartup siorna nassiussatta assigaa. Tamatumunnga atatillugu oqaatigineqassaaq meeqqanik kommunit meeqqeriviinut taamatullu meeqqanut paaqqinnittartunut namminersortunut inissiinermut atatillugu inuit paarsisup angerlasimaffiani najugaqartut tamarmik 18-inik ukioqalereersimasut meeqqanik pinerliisimannginnermut uppernarsaammik tunniussaqarnissaannik piumasaqarneq siunnersuummiit peerneqarmat. Tamatumunnga tunngavigineqarpoq Justistministeriaqarfimmiit erseqqissaatigineqarmat pinerlussimasunik nalunaarsuinermut nalunaarummi taamaallaat paarsisoq kisimi meeqqanik pinerliisimannginnermut uppernarsaammik pissarsiffigineqarnissa piumasarineqartoq.

Siunnersuutip pingaarnertut siunertaraa meeqqat paaqqinnittarfimmiinnerminni, atuarfimmiinnerminni, timersornikkut peqatigiiffimmiinnerminni assigisaaniinnerminnilu pinerluffigineqarnissaannut illersorneqarnissaat. Siunnersuuteqarnikkut meeqqanut tunngassuteqartumik ingerlatsivinni atorfinitsitaanikkut suliaqarnikkullu meeqqanik pinerliisimannginnermut uppernarsaammik takutitsinissap piumasaqaatigineqarnera eqqunneqartussanngorpoq. Tamatumalu kingunerissavaa soorlu assersuutigalugu meeqqerivinni, atuarfinni, timersoqatigiiffinni assigisaannilu atorfinitsitaanermut sulilernermullu atatillugu toqqaannartumik meeqqanut attaveqarfiusinnaasuni sulilernermi meeqqanik pinerliisimannginnermut uppernarsaammik pissarsinissaq piumasarineqartussanngormat. Soorlu takuneqarsinnaasoq siunnersuutip saaffigisai pingaarnerit tassaammata ingerlatsiviit meeqqanut tunngassuteqartumik suliaqartut kiisalu atorfinitsitsinissamut sulilersitsilernissamullu piginnaatitaaffeqartut. Meeqqanik pinerliisimannginnermut uppernasaatitut paasisariaqartoq tassaavoq Qitiusumik Pinerlussimanermut Nalunaarsuiffiup nalunaarsugaani meeqqanik 15-t inorlugit ukiulinnik pinerluuteqarsimanermut tunngatillugu nalunaarsukkaniit paasissutissat tunniunneqartut. Tamakkua tassaapput qitornanik/qanigivallaakkanik atoqateqarnerit, meeqqanik 15-t inorlugit ukiulinnik atoqateqarnerit maluunnit allatigut kinguaassiuutitigut pinerliinerit, meeqqat kinguaassiuutitigut atoqatiginerinik isiginnaagassanik siaruarterinerit tigumiaqarnerillu, allatigullu kanngunartuliornerit. ”Toqqaannartumik attaveqarsinnaanermut” tunngatitat tassaapput meeqqanut 15-t inorlugit ukiullit attuumaasuteqartumik nakkutigineqanngitsumillu najuisinnaanerit. Kiisalu meeqqanik pinerliisimannginnermut uppernarsaatit taamallaat inuit meeqqanik 15-t inorlugit ukiulinnik toqqaannartumik attaveqarfiusinnaasuni atorfinitsiineqarnerinut sulilersinneqarnerinullu atatillugu piumasarineqarsinnaapput. Tamatumunngalu atatillugu meeqqanik pinerliisimannginnermut uppernarsaammik piumaffigineqartup taamatut piumaffigineqarnissaa sioqqullugu ersseqqissumik oqaloqatigereersimanissaa piumasarineqarpoq.

Tamatumunngalu ilutigitillugu erseqqissaatigineqassaaq Naalakkersuisoqarfiup tusarniaanermut atatillugu akissuteqaatinik tigusaqanngikkuni tusarniaanermi siullermi akissuteqaatit toqqaammaviginiarmagit, kiisalu tamatumuuna atatillugu oqaaseqaatinut tapiliussassanik nassiussaqarnissaq periarfissaqartillugu.

Tusarniaanerup qanoq ingerlanissaa apeqqutaatillugu kiisalu Inatsisartut siunnersuummik suliaqarnerata kingunissaa apeqqutaatillugu siunniunneqarpoq siunnersuut 1. august 2010 atortuulersinneqassasoq.

Siunnersuutip siunertarisaanut tunngatillugu, tunuliaqutarineqartunut tunngatillugu taamatullu imarisaanut tunngatillugu annertunerusumik paasinninnissanut siunnersuummut oqaaseqaatigineqartut ilanngullugit nassiunneqartut innersuutigineqassapput.

Peqqussitissatut siunnersuummut atatillugu oqaaseqaataajumaartussat Kulturimut, Ilinniartitaanermut, Ilisimatusarnermut Ilageeqarnermullu Nalakkersuisoqarfimmit Postbx 1029, 3900 Nuummiittumit kingusinnerpaamik 16. februar 2010 tiguneqareersimassapput

Inussiarnersumik inuulluaqqusillunga

Marcus Dalro

Inatsisileritooq

mada@gh.gl

Ilanngussat:

1) Pinngitsoorani meeqqanik pinerliisimannginnermut uppernarsaammik pissarsinissamut tunngatillugu Inatsisartut inatsisissaannut siunnersuut kalaallisut qallunaatullu.

2) Tassunga atatillugu oqaaseqaatit kalaallisut qallunaatullu.