Allakkerineq pillugu Inatsisartut inatsisissaattut siunnersuut aamma nalunaarut

Allakkerineq pillugu Inatsisartut inatsisissaattut siunnersuut uani aaneqarsinnaavoq

Allakkerineq pillugu Inatsisartut inatsisissaattut siunnersuummut nassuiaatit uani aaneqarsinnaapput

Allakkerineq pillugu nalunaarut uani aaneqarsinnaavoq

Naalakkersuisoqarfiup 4. december 2009-mi allakkerineq pillugu Inatsisartut peqqussutaata nr. 8-p,14. november 2004-meersup allannguutissaatut siunnersuut tusarniaassutigalugu nassiuppaa. Naalakkersuisoqarfik tusarniaanermi akissuteqaatinik arlalinnik tigusaqarpoq, taakkunanilu inatsimmut allannguutissap inatsisitigut inissisimanermut sunniutissai annilaanganartoqartinneqarput. Taamaattumik allannguutissatut siunnersuut saqqummiunniarnagu, tassungalu taarsiullugu Inatsisartut inatsisissaannik nutaamik nalunaarusiamillu suliaqarniarluni Naalakkersuisoqarfik aalajangerpoq.

Suliffeqarfiup piunerminut tunngavigisaanik ingerlatsiinnarnissap qulakkeerneqarnissaa siunnersuummi pingaarnertut siunertarineqarpoq, taamaatumillu siunnersuutit aalajangersakkanik, ingerlatsinerup kiisalu aningaasaqarnerup pitsanngorsarneqarnissaannut tunngavissanik imaqarput. Innuttaasut allakkerinikkut tunngaviusumik sullinneqarsinnaanerisa, tamatumalu saniatigut sullissinerit piffissamut naleqqukkunnaartut aningaasaqarnikkulluunniit iluanaarutaasinnaajunnaartut allanngortinneqarsinnaanissaannut periarfissinneqarsinnaanissaasa pigiinnarnissaat inatsimmi siunnerfigineqarpoq. Tassanili sullitatigut tunngaviusut kiisalu ingerlatsinermi aningaasaqarnikkut eqqarsaatigisassat eqqarsaatigineqarnissaat tunngavigineqassaaq.

Sullissinerit pingaarnerit, kiisalu Inatsisartut inatsisaanni pisussaaffiit pigiinnarnerisigut inatsimmi siunertaasoq anguneqassaaq. Inatsimmi suli angallassinissamut pisussaaffeqarneq kisermaassisinnaatitaanerlu tunngavigineqassaaq, kisiannili peqqussummi 2004-meersumi sullissinernik immikkut ittunik, POST Greenlandip suliassaanik amerlasuukkaaraluni ingerlatsineq maleruagassiuunneqaraluartoq, siunissami amerlasuukkaaraluni sullissinerit maligassiuunnissaannut Naalakkersuisut piginnaatinneqassapput. Taamaalilluni Naalakkersuisut angallassinissamut pisussaaffiup, agguaanissamut pisussaaffiup kiisalu kisermaassisinnaatitaanerup imassai sukumiisumik maleruagassiorsinnaalissavaat. Tamatuma saniatigut allakkerinermi sullissiviit, maalaarutit taarsiissuteqartarnerlu il.il. pillugit Naalakkersuisut sukumiisunik aalajangersaasinnaalissapput.

Taamaattoq KANUKOKA-p tusarniaaffigineqarnerani akissuteqarnissamut killissarititaasoq aatsaat 5. januar 2010-mut killilerneqarpoq.

Oqaaseqaatit ataatigut atsiortumut mail-ikkut lmsk@nanoq.gl-imut imaluunniit allagaannartigut nassiunneqassapput, uunga; Ineqarnermut, Attaveqarnermut Angallannermullu Naalakkersuisoqarfik, Postboks 909, 3900 Nuuk