Akissarsiaqartitsineq pillugu nalunaarutissamut siunnersuummut missingiut

Akissarsiaqartitsineq pillugu nalunaarutissamut nr. xx, 2008-meersussamut siunnersuummut missingiut kalaallisut qallunaatullu matumuuna tusarniaatigalugu nassiunneqarpoq, ullumimiit sap. ak. tallimat akissuteqarnissamut piffissaritillugit.

Inatsimmi allannguutip qulaani taaneqartup Kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu Namminersornerullutik Oqartussat nalunaarutaat nr. 35, 5. oktober 2001-imeersoq taarsissavaa.

Siunnersuummi pineqarput kommunerujussuanngortussat nutaat sisamat pilersinneqarnerannut atatillugu akissarsiaritinneqartussat nutaat. Taakku naapertorlugit borgmesterit assigiimmik akissarsiaqartinneqalissapput kommunip angissusia apeqqutaatinnagu naalakkersuisunullu ilaasortap akissarsiaanut qanillattukkamik aningaasartalimmik - missingiummi § 1 naapertorlugu akissaateqarfimmi aalajangersimasumi inissitamik akillu naleerukkiartornerannut iluarsineqartartumik.

Akissarsiaritinneqartartussat allat tamarmik siunnersuutigineqarpoq borgmesterip akissarsiaata aggorneratut aalajangersimasutut inissinneqassasut, taamalu aamma taassumatut akit naleerukkiartornerannut iluarsineqartartumik.

Akissarsiaritinneqartartut tamarmik qaffanneqarput aalajangersimasumillu akissarsiaritinneqartartussatut siunnersuutigineqarlutik, ilaatigut ass. § 5 takuuk, siunertarineqarmat akissarsiaritinneqartukkut qinigaaneq naapertorlugu ataatsimiititaliani ilaasortaaffigiunnakkani tamani sulineq tamarmi matussuserneqassasoq. Taamaattorli § 7 naapertorlugu ataatsimiititaliat siulittaasuinut suli ilassutitut akissarsiaqartitsisoqarsinnaavoq § 1, imm 1. naapertorlugu borgmesterip akissarsiaata avinneranik aalajangersimasutut annertussusilimmik.

Siunertaavoq nalunaarutissatut siunnersuut manna ulloq 1. januar 2009 atuutilissasoq, kommunit aqunneqarneranut pillugu inatsisartut inatsisaata atuutilerneranut peqatigitillugu.

Suliassamut tusarniaassutigineqartumut atatillugu allakkatigut oqaaseqaatit Nunami Namminermi Pissutsinut Ingerlatseqatigiiffinnullu immikkoortortaqarfimmut nassiuteqquneqarput kingusinnerpaamik tallimanngornermi ulloq 28. november 2008.

Immikkoortortaqarfik qaqugukkulluunniit piareersimavoq nalunaarutissamut missingiummut matumunnga tunngatillugu paasiniaavigineqarnissaminut. Piffissap tusarniaaviusup naannginnerani saaffiginninneq pisinnaavoq ataani atsiortumut oqarasuaat 34 51 29 atorlugu imaluunniit Nunami Namminermi Pissutsinut Ingerlatseqatigiiffinnullu Immikkoortortaqarfimmut allakkatigut saaffiginninnikkut.

Ikinngutinnersumik inuulluaqqusillunga

Susanna Figgé
sufi@gh.gl

Akissarsiaqartitsinissaq pillugu nalunaarutissamut missingiut