Air Greenland A/S

Kalaallit Nunaanni silaannakkut angallasseqatigiiffik Grønlandsfly (2002-mi Air Greenland-imik atserneqartoq) 1960-imi pilersinneqarpoq. Ukiuni siullerni timmisartut Catalina-t, imaanut aammalu Narsarsuarmi Kangerlussuarmilu mittarfinnut, sorsunnersuit aappaanni Amerikami sakkutuunit pilersinneqartunut missinnaasut atorneqarput. Illoqarfimmut mittoqassatillugu “mittarfik” iluliaajarneqartarpoq sikutamernillu piiarneqartarlutik, aammalu illoqarfiit tamarmik immikut mittarfittut ilisarnaateqarput, illoqarfimmi illut toqqarneqartut qaliaannut qalipallugit allanneqartunik.

1965-imi illoqarfiit tamarmik heliportilersorneqarput, aammalu qulimiguullit S-61-it, 20-t tikillugit ilaasoqarsinnaasut atorlugit timmisartuussisoqartalerluni. Piffissap taamaalernerani Kalaallit Nunaanni timmisartuussiviusoq 3000 km-it missaannik isorartussuseqarpoq, tassalu silarsuarmi angallaviit qulimiguulik atortullugu sullissiviusut isorartunersaralugu. Ukiumut ilaasut 15.000-t timmisartuunneqartarput, taakkulu ukiut qulit ingerlanerini 50.000-inut amerleriarput.

1660-ikkunni aamma 1970-ikkunni Kalaallit Nunaanni ineriartupiloornerup kingunerisaanik nassiussanik ilaasunillu angallassinissamut pisariaqartitsineq qaffappoq, aammalu qulimiguulinnik ingerlatsineq akisoorsuummat, timmisartuussinerup timmisartut suluusallit atorlugit timmisartuussinermut ikaarsaartikkiartuaarneqarnissaa aalajangiunneqarpoq. Mittarfinnik sanaartortoqalerpoq, aallaqqaammut Nuummi (1979) aamma Ilulissani (1983), kingusinnerusukkullu Kalaallit Nunaata Kitaata sineriaa sinerlugu illoqarfiit amerlanersaanni sanaartortoqarluni. Ullumikkut Kalaallit Nunaata iluani timmisartuussinerit amerlanersaat timmisartut DASH-7-it, 50-it tikillugit ilaasoqarsinnaasut atorlugit ingerlanneqarput – akuttunngitsumik timmisartup iluata ilaa nassiussanut atorneqartarluni. Illoqarfiit ataasiakkaat nunaqarfiillu suli qulimiguullit assigiinngitsunik angissusillit atorlugit timmisartuussivigineqartarput.

Air Greenland-ip aamma annaassiniarnerit ujaasisarnerillu isumagisarpai, aammalu napparsimasunik napparsimmavinnut annernut nuussisoqassatillugu, imaluunniit Danmarkimut katsorsartikkiartortoqassatillugu ambulancitut atortarluni. Taakku saniatigut Air Greenland timmisartut qulimiguullit atorlugit aatsitassanik ujarlernermut atatillugu ikiuuttarpoq, aammalu timmisartuutiminik Kalaallit Nunaata iluani avataanilu attartortitsisarluni. Air Greenland-ip timmisartuutai atortuilu ilaatigut Qalasersuarmi, Nepal-imi Afrika-milu sulinermut atorneqartarput.

1990-ikkut naaneranni Air Greenland aalajangerpoq SAS, piffissaq tamanna tikillugu Kalaallit Nunaata Danmarkillu akornanni timmisartuussisarnermik kisimiilluni isumaginnittuusimasoq unammillerniarlugu. Air Greenland timmisartunik sukkasulianik marlunnik pisivoq, ukiullu marlussuit qaangiummata SAS ukioq kaajallallugu timmisartuussisarnerminit tunuarpoq. Air Greenland-ip maanna Danmarkip aamma Kangerlussuup Narsarsuullu akornanni ukioq kaajallallugu timmisartuussisarneq isumagisaraa. Ukiuunerani sapaatit akunnerannut tallimariarluni attaveqartoqartarpoq, aasaaneranilu sapaatit akunnerannut quliniit aqqaneq marluk tikillugit attaveqartoqartarluni.

Ilaasartut amerliartornerat annertungaatsiarsimavoq: 1965-imi ilaasut 15.000-iusimallutik amerlassutsimikkut 40-riaat sinnerlugu amerleriarsimapput. 2006-imi Air Greenland-ip ilaasut 310.000-it sinnerlugit amerlassusillit timmisartunut tikilluaqqusinnaasimavaat.