Qeqertarsuaq

Ukiuunerani decembarip ulluisa aallaqaataata aamma maajip ulluisa 15-ata akornanni Air Greenland A/S-ip Qeqertarsuaq timmisartuussivigisarpaa. Ukiuunerani angalanissanut pilersaarummi Ilulissat aallaavigineqartarpoq. Nunap immikkoortuani illoqarfiit akornanni qulimiguulik Sikorsky S-61N, 19-it missaannik ilaasoqarsinnaasoq atorlugu timmisartuussisoqartarpoq.

Qeqertarsuup Tunuani illoqarfiit akornanni sapaatit akunnerannut marluk sisamallu akornanni timmisartuussisoqartassaaq.

Aasaanerani maajip ulluisa 15-anniit novembarip ulluisa 30-annut Disko Line A/S Qeqertarsuarmut umiarsuarmik angallassisarpoq. Sapaatit akunnerannut pingasut sisamallu akornanni tikittoqartarpoq.

Disko Line A/S juunip ulluisa 16-anniit septembarip ulluisa 15-annut niuernermik tunngaveqarluni angallassisarpoq, tamatumalu kingorna piffissamut angallassiffiulluartumut naleqqiullugu akit allanngortissinnaassallugit.

Sikoqannginnerata nalaani sapaatit akunnerannut ataasiarluni marloriarluniluunniit nioqqutissanik nutaanik allakkanillu Kangerlummut assartuisoqartarpoq.

Sapaatit akunneri pingasukkaarlugit nassiussanik oqimaatsunik piffissamilu sivisuumi atasinnaasunik assartuisoqartarpoq. Umiarsuaaqqat assartuutit ilaasoqartanngillat.

Niuernermik tunngaveqarluni angallassineq

Ilulissat Aasiaallu aqqutigalugit niuernermik tunngaveqarluni angallassisoqartarpoq.