Ukiuunerani decembarip ulluisa aallaqaataata aamma maajip ulluisa 15-ata akornanni Air Greenland A/S-ip illoqarfiit nunaqarfiillu timmisartuussivigisassavai.
Ukiuunerani angalanissanut pilersaarummi Aasiaat aallaavigineqartassaaq. Nunap immikkoortuani illoqarfiit akornanni qulimiguulik 5-9-it missaannik ilaasoqarsinnaasoq atorlugu timmisartuussisoqartassaaq. Qulimiguulik tallimanik ilaasoqarsinnaasoq nunaqarfiit akornanni timmisartuussitinneqartassaaq.
Qeqertarsuup Tunuani illoqarfiit akornanni sapaatit akunnerannut marluk sisamallu akornanni timmisartuussisoqartassaaq, kiisalu nunaqarfinnut sapaatit akunnerannut ataatsip sisamallu akornanni timmisartuussisoqartassalluni.
Nunaqarfiit akornanni bilitsimut akiusumut tunngavigineqartoq 616 kr.-it missaaniissaaq illoqarfiillu akornanni 1068 kr.-it missaanniissalluni.
Aasaanerani maajip ulluisa 15-anniit novembarip ulluisa 30-annut Disko Line A/S distriktimi illoqarfiit nunaqarfiillu akornanni umiarsuarmik angallassisassaaq sapaatit akunnerannut minnerpaamik marloriarlutik tikinneqartassapput.
Umiarsuarmik angallassinermut akiusoq 2006-imi 2005-imi akigititaasunut naleqqiullugu 10 %-it missaannik annertunerussaaq. Disko Line A/S juunip ulluisa 16-anniit septembarip ulluisa 15-annut niuernermik tunngaveqarluni angallassisassaaq, tamatumalu kingorna piffissamut angallassiffiulluartumut naleqqiullugu akit allanngortissinnaassallugit.
Sapaatit akunneri pingasukkaarlugit nassiussanik oqimaatsunik piffissamilu sivisuumi atasinnaasunik assartuisoqartassaaq. Umiarsuaaqqat assartuutit ilaasoqartanngillat. Sikoqannginnerata nalaani sapaatit akunnerannut ataasiarluni marloriarluniluunniit nioqqutissanik nutaanik allakkanillu nunaqarfinnut assartuisoqartassaaq.
Niuernermik tunngaveqarluni angallassineq
Aasiaat Ilulissallu aqqutigalugit niuernermik tunngaveqarluni angallassineq anguneqassaaq.