Ukiuunerani decembarip ulluisa aallaqaataata aamma maajip ulluisa 15-ata akornanni Air Greenland A/S-ip illoqarfiit nunaqarfiillu sullittarpai. Ukiuunerani angalanissanut pilersaarummi Ilulissat aallaavigineqartarput. Nunap immikkoortuani illoqarfiit akornanni qulimiguulik Sikorsky S-61N, 19-it missaannik ilaasoqarsinnaasoq atorlugu timmisartuussisoqartarpoq. Qulimiguulik tallimanik ilaasoqarsinnaasoq nunaqarfiit akornanni timmisartuussitinneqartarpoq.
Qeqertarsuup Tunuani illoqarfiit akornanni sapaatit akunnerannut marloriarluni sisamariarluniluunniit timmisartuussisoqartarpoq, kiisalu nunaqarfiit sapaatit akunnerannut ataatsip sisamallu akornanni timmisartuussivigineqartarlutik.
Aasaanerani maajip ulluisa 15-anniit novembarip ulluisa 30-annut Disko Line A/S distriktimi illoqarfiit nunaqarfiillu akornanni umiarsuarmik angallassisarpoq. Illoqarfiit sapaatit akunnerannut pingasoriarlutik sisamariarlutilluunniit tikinneqartarput, kiisalu nunaqarfiit sapaatit akunnerannut minnerpaamik ataasiarlutik marloriarlutilluunniit tikinneqartarlutik. Disko Line A/S juunip ulluisa 16-anniit septembarip ulluisa 15-annut niuernermik tunngaveqarluni angallassisarpoq, tamatumalu kingorna piffissamut angallassiffiulluartumut naleqqiullugu akit allanngortissinnaallugit.
Sikoqannginnerata nalaani sapaatit akunnerannut ataasiarluni marloriarluniluunniit nioqqutissanik nutaanik allakkanillu assartuisoqartarpoq.
Sapaatit akunneri pingasukkaarlugit nassiussanik oqimaatsunik piffissamilu sivisuumi atasinnaasunik nunaqarfinnut assartuisoqartarpoq. Umiarsuaaqqat assartuutit ilaasoqartanngillat.
Niuernermik tunngaveqarluni angallassineq
Arctic Umiaq Line apriilip aallartinneraniit decembarip aallartinneranut avannamut Ilulissaniit kujammut Narsarsuarmut umiarsuarmik angalasarpoq.
Air Greenland A/S ukioq kaajallallugu timmisartumik Upernavimmut, Uummannamut, Aasiannut Kangerlussuarmullu timmisartuussisarpoq.
Royal Arctic Line A/S nassiussanik Ilulissanut assartuisarpoq.
Royal Arctic Bygdeservice A/S nunaqarfinnut sullissisarpoq.