Aasiaat

Ukiuunerani decembarip ulluisa aallaqaataata aamma maajip ulluisa 15-ata akornanni Air Greenland A/S-ip illoqarfiit nunaqarfiillu timmisartuussivigisarpai.

Ukiuunerani angalanissanut pilersaarummi Ilulissat aallaavigineqartarpoq. Nunap immikkoortuani illoqarfiit akornanni qulimiguulik Sikorsky S-61N, 19-it missaannik ilaasoqarsinnaasoq atorlugu timmisartuussisoqartassaaq. Qulimiguulik tallimanik ilaasoqarsinnaasoq nunaqarfiit akornanni timmisartuussitinneqartarpoq.

Qeqertarsuup Tunuani illoqarfiit akornanni sapaatit akunnerannut marluk sisamallu akornanni timmisartuussisoqartarpoq, kiisalu nunaqarfinnut sapaatit akunnerannut ataatsip sisamallu akornanni timmisartuussisoqartarluni.

Aasaanerani maajip ulluisa 15-anniit novembarip ulluisa 30-annut Disko Line A/S distriktimi illoqarfiit nunaqarfiillu akornanni umiarsuarmik angallassisarpoq. Illoqarfiit sapaatit akunnerannut pingasoriarlutik sisamariarlutilluunniit tikinneqartarput, kiisalu nunaqarfiit sapaatit akunnerannut minnerpaamik ataasiarlutik marloriarlutilluunniit tikinneqartarlutik. Tamatuma saniatigut Disko Line A/S juunip ulluisa 16-anniit septembarip ulluisa 15-annut niuernermik tunngaveqarluni angallassisarpoq, tamatumalu kingorna piffissamut angallassiffiulluartumut naleqqiullugu akit allanngortissinnaallugit.

Sikoqannginnerata nalaani sapaatit akunnerannut ataasiarluni marloriarluniluunniit nioqqutissanik nutaanik allakkanillu nunaqarfinnut assartuisoqartarpoq.

Sapaatit akunneri pingasukkaarlugit nassiussanik oqimaatsunik piffissamilu sivisuumi atasinnaasunik assartuisoqartarpoq. Umiarsuaaqqat assartuutit ilaasoqartanngillat.

Niuernermik tunngaveqarluni angallassineq

Arctic Umiaq Line apriilip aallartinneraniit decembarip aallartinneranut avannamut Ilulissaniit kujammut Narsarsuarmut umiarsuarmik angalasarpoq.

Air Greenland A/S ukioq kaajallallugu timmisartumik Uummannamut, Ilulissanut Kangerlussuarmullu timmisartuussisarpoq.

Royal Arctic Line A/S nassiussanik Aasiannut assartuisarpoq.

Royal Arctic Bygdeservice A/S nunaqarfinnut sullissisarpoq.