Angallannermi pissutsit

Taamaattumik nunatsinni sumiiffiit pilersorneqassappata, aammalu inuit akit naammaginartut atorlugit angalanissamut periarfissinneqassappata, Namminersorlutik Oqartussat ilaasunik nassiussanillu assartuinissamut tapiissuteqarnissaat pisariaqarpoq. Sumiiffinni taakkunani ilaasup bilitsimut akiliutaa assartuinermi aningaasartuuterpianik tamakkiisunik matussusiisanngilaq. Sumiiffiit taakku sullissinissamik isumaqatigiissutit, imaappoq Namminersorlutik Oqartussanit tapiissutit atorlugit akilerneqartartut tunngavigalugit sullinneqarput.

Taamaattorli timmisartumut ilaasartut timmisartukkullu nassiussat amerlanersaat pisortanit tapiiffigineqanngitsumik assartorneqartarput. Assartuineq niuernermi piumasaqaatit malillugit assartuinertut ingerlanneqartarpoq. Tassalu sullissisuusup ilaasup bilitsissaata akia aalajangertarpaa, ilaasullu bilitsimut akiliutaa assartuinermi aningaasartuutinut matussutigineqartarpoq. Niuernermik tunngaveqarluni angallassinermut ilaasut amerlasarnerat aammalu timmisartunut suluusalinnut mittarfiliortoqarsimanera nalinginnaasumik ilisarnaataasarput.