Namminersornerullutik Oqartussat

Namminersorneruneq 1979-imiilli

Kalaallit Nunaata Namminersornerullutik Oqartussaqarnerat tunngavilerluni atuutilerneqarpoq 1. maj 1979 taasititsisoqareernerata kingorna nunatsinni januar qaammat. Qinersisinnaasut 63 pct.-ii taasipput, taakkunannga 12.754 isumaqataasut kiisalu 4.705 akerliullutik Namminersornerunerup atuutilernissaanut. Inatsisitut siunnersuummut Qallunaat Nunaanni folketingimi partiit tamarmik marluk minillugit atuutsitsilernissamut isumaqataapput.

Inatsit malillugu Kalaallit Nunaat immikkuullarissumik, nunap inoqqaavinik najugaqarfigineqartumik Qallunaat Nunaata naalagaaffiata iluani allaqqalerpoq.

Kalaallit Nunaata pisortatigoortumik aningaasartuutaasa affaasa missai 2,6 mia. kr. (1998) Qallunaat Nunaannit tapiissutigineqartarput, taakkulu Kalaallit Nunaanni Namminersornerullutik Oqartussanik aqunneqarlutik.

Namminersornerullutik Oqartussat qinikkanit Inatsisartoqarpoq 31-nik ilaasortaqartumik, taakkulu ukiut sisamakkaarlugit qinersisoqartarluni, minnerpaamillu ukiumut marloriarluni Nuummi katersuuttarlutik. Siulittaasoq taakkunannga toqqarneqartarpoq immikkullu allattoqarfeqarluni. Inatsisartut aaliagersimasunik ataatsimiititaliaqartiterput ombudsmandeqarlunilu. Inatsisartut Naalakkersuisunik toqqaasarput, taakkunanilu Naalakkersuisut siulittaasuat allaffissornermi aquttoqaralugu.

Naalakkersuisuni ilaasortat naalakkersuisoqarfiit ataasiakkaat aqutaraat.

Naalakkersuisuni siulittaasup allatseqarfiata naalagaaffeqarnermut kommuninullu tunngasuni attaveqarneqarneq ilaatigut susassaqarfigaat, apeqqutillu aatsitassaqarnermut nunanullu allanut tunngasut suliarisarlugit. Qallunaat Nunaanni allaffeqarfik, Bruxelles-imi Ottawa-milu aallartitaqarfiit aamma Naalakkersuisut siulittaasuata ataani immikkoortortaapput.

Kalaallit Nunaata sinniisoqarfia Qallunaat Nunaanni 1979-imiilli Namminersornerullutik Oqartussat susassaqarfiini ataqatigiissaarisuupput.
Bruxelles-imi sinniisoqarfik EU-mi 1992-imiilli pilersinneqarsimavoq, nunattalu EU-mi soqutigisai ingerlataralugit.

Ottawa-mi Qallunaat Nunaata ambassade-ani Kalaallit Nunaat aallartitaqalerpoq 1998-imi, taassumalu nunatta Canada-mi soqutigisai ingerlataralugit.

Naalakkersuisoqarfiit allat susassaqarfimminni immikkoortitigaapput.

Partiit

Inatsisartuni issiatitaqarput: Siumut, Atassut, Inuit Ataqatigiit kiisalu partiit avataaneersut.