Ataatsimeersuarnermi sammineqassaaq: Aanngajaarniutit sumiiffimmi qitiutillugit meeqqat inuusuttullu pinaveersaartitsinermik suliniuteqarfigineqarnerat.
Nunani Avannarlerni imigassap aanngajaarniutillu pillugit siunnersuisartut suleqatigiinnerat pitsanngorsarniarnissaanik ataatsimeersuarneq siunertaqarpoq, makku eqqarsaatigalugit:
- Ilisimateqatigiittarnissaq nunani taakkunani immikkut imigassap aanngajaarniutillu pillugit pinaveersaartitsinerup tungaatigut susoqarnersoq, suullu siunissami tamatumani pilersaarutaanersut.
- Oqallittarfimmik pilersitsinissaq, sulianik ingerlatsinermi periusissanik periaatsinillu oqallinnissamut periarfissiisinnaasunik.
- Ataatsimut ilisimasanik najoqqutassioqatigiittarnissaq, pinaveersaartitsiniarnermi ilisimasanik misilittakkanillu tunngavilinnik, siunissami suliassanik siunnersuinissanut aalajangiinissanullu toqqammaviusinnaasunik.
Nunat Avannarliit Aanngajaarniutit pillugit Ataatsimeersuartarnerat 1984-imili nunani taakkunani paarlakaajaalluni ingerlanneqartalerpoq. Ataatsimeersuarnerni ilaasarput nunani peqataasuni aalajangiisartunut siunnersuisartut, aanngajaarniutillu pillugit pinaveersaartitsinermi suliaqartartut.
Nordisk Ministerråd ataatsimeersuarnermut aningaasaliivoq, nunani avannarlerni aanngajaarniutit pillugit ataatsimeersuarnerni aqutsisoqatigiinnit aaqqissuunneqartunik. PAARISA aamma Nuup Kommuneani Pilersaarusiornermut Pinaveersaartitsinermullu immikkoortortaqarfik aaqqissuisuupput.
Ataatsimeersuarneq ammarneqassaaq Peqqissutsimut, Avatangiisinut Pinngortitamullu Naalakkersuisumit, Asii Chemnitz Narup-imit Nuup Kommuneanilu Isumaginninnermik pisortamit Vibeke Møller Jensen-imit.
Ataatsimeersuarnermi inuit 60-it missaanniittut peqataassapput.
Pilersaarut uani atuaruk www.nrk2006.gl
Paasisaqarluarnerorusukkuit attaviikkit Peqqissutsimut Pisortaqarfik ¿ Paarisa saqqummiusisoralugu siunnersorti Berti Bourup, tlf. 34 66 73, e-mail Berti@gh.gl imaluunniit pinaveersaartitsinermut Nuup Kommuneani siunnersorti Line Dalenfoft, tlf. 552493, e-mail lida@nuuk.gl