Borgmesterit arlallit oqaaseqaataat Radioavisikkut ulluni 20. aamma 21. juli 2004-mi issuaavigineqarput innaallagissap sarfaanut, imermut kiassarnermullu assigiimmik akeqartitsineq allanngortinneqassappat kommunit aningaasartuutaat qaffassammata kommunini akileraarutit qaffanneqartariaqalissallutik.
Paasissutissat taakku eqqortuunngillat. Akerlianilli Naalakkersuisut neriorsuutigaat assigiimmik akeqartitsinerup iluarsartuuteqqinnerata kingunerisaanik kommuninut toqqaannartumik ajunaaruteqaataassanngitsoq. Naalagaafimmit tapiissutit pillugit kommuninut isumaqatigiissummi neriorsuutaasoq Naalakkersuisut eqquutitippaat, Aningaasanut Nunanullu allanut Naalakkersuisoq Josef Motzfeldt oqarpoq.
Borgmesterit oqaaseqaataasa ersersippaat ukiumut missingersuusiorfiusumut 2005-imut kommuninut naalagaaffimmit tapiissutit pillugit Naalakkersuisut KANUKOKA-llu ukioq manna junip 22-anni isumaqatigiissutaannut borgmesterit paasiniaalluarsimanngitsut.
Isumaqatigiissummi allassimavoq illuatungeriit isumaqatigiittut assigiimmik akeqartitsinerup iluarsartuuteqqinnissaa Inatsisartut akuersissutigissapassuk naalagaaffimmit tapiissutit isumaqatiginninniutigineqaqqissasut, assigiimmik akeqartitsinerup iluarsartuuteqqinnerata kingunerisaanik atuineq allanngortinnagu kommunit tamarmik immikkut 2005-imi aningaasartuutiginerusaat aningaasartuutikinnerussutaallu naalagaaffimmit tapiissutinit iluarsiivigineqartussanngorlugit.
Assigiimmik akeqartitsinerup ilusartuuteqqinneranut toqqaannartumik attuumassutilittut kommunit suliffeqarfiutaanut sunniutit kiisalu pisortat ikiorsiissutaanut sunniutit kommuninut annaasaqaataasanngillat. Imaappoq assigiimmik akeqartitsinerup iluarsartuuteqqinnera aningaasalersorneqarnavianngilaq kommunit akileraautigititaasa qaffannerisigut imaluunniit kommunini namminerni tulleriiaarinerit allanngortiternerigut.
Aningaasanut Nunanullu allanut Naalakkersuisup Josef Motzfeldtip kommuninut soqutiginnittunullu allanut aamma kajumissaarutigaa massakkut tusarniaanermi ulloq 23. august 2004-mi naammassineqartussami assigiimmik akeqartitsinerup allanngortinnissaa pillugu naliliissutitik isummatillu tusarliuteqqullugit.
Paasissutissat allat: attavigiuk Immikkut siunnersorti Anders H. Nielsen, Aningaasaqarnermut Pisortaqarfik, oqarasuaat 34 52 12.