Inatsisartut Isumaginninnermut Suliffeqarnermullu Ataatsimiititaliaata ataatsimiinnermini kingullermi aalisarnermik inuussutissarsiuteqarnermi ajornartorsiutit taakkulu Royal Greenland A/S’ip tunisassiorfiini sulisoqarnikkut malitsigisatut sunniutissai oqaluuserai. Ataatsimiititaliap aarleqqutigaa tamanna suliffissaqartitsinermut tamarmiusumut ajorluinnartumik kinguneqassasoq, ajornartorsiornerummi ilaqutariippassuit eqqortussaammagit, kommunit aningaasaqarnerat an-nertuumik mangiassammagu, taamaalillunilu aalisarnerup saniatigut inuussutissarsiutit allat piu-innartinneqarnissaannut periarfissatigut, nangittumillu inerisaavigineqarnissaannut pitsaan-ngitsumik sunniuteqarfigissallugit, taamaalillunilu aalisarnermi ajornartorsiutit suliffissaqar-titsiniarnermut tamarmiusumut ajorseriartitseqataassaalluni.
Taamaammat Inatsisartut Isumaginninnermut Suliffeqarnermullu Ataatsimiititaliaat isumaqarpoq aalisarnermik inuussutissarsiornermi ajornartorsiorneq piaarnerpaamik aaqqiivigineqartariaqartoq, Naalakkersuisullu aamma Isumaginninnermut Suliffeqarnermullu Naalakkersuisoq qinnuigalugit Royal Greenland A/S’ip tunisassiorfiini suliffissaqartitsiniarnikkut pissutsit ilorraap tungaanut saatinniarlugit iliuuserineqartut assigiinngitsut pillugit nassuiaateqaqqullugit.
Ataatsimiititaliattaaq ilanngullugu qinnutiginiarpaa Aalisakkat Takkusimaanngiffiisa Nalaani Suliassaaleqisarnerup Akiorniarneqarneranut aamma Immikkut Ittumik Suliffissaqartitsiniarneq Pillugu Iliuuserineqartunut (Tunisassiorfiit Naleqqussaavigineqarnerat) aningaasaliissutit atorneqartarneri nassuiaatigineqassasut.
Inatsisartut Isumaginninnermut Suliffeqarnermullu Ataatsimiititaliaata uku ilaasortarai:
Inatsisartuni ilaasortaq Godmand Rasmussen, siulittaasoq. Tlf. 55 73 98-imut annertunerusumik paasiniaavigineqarsinnaasoq
Inatsisartuni ilaasortaq Ruth Heilmann, siulittaasup tullia. Tlf. 52 16 54-imut annertunersumik paasiniaavigineqarsinnaasoq.
Inatsisartuni ilaasortaq Mikael Petersen
Inatsisartuni ilaasortaq Asii Chemnitz Narup
Inatsisartuni ilaasortaq Loritha Henriksen