Aningaasaliissutissat isumaqatigiissutigineqarput

2002-imi ilassutitut aningaasaliissutissat isumaqatigiissutigineqarput.

2001-imi ulloq unnuarlu paaqqinnittarfinni ilinniarfinnilu qassiini missingersuutit sipporujussuarneqartarsimapput. 2002-mi sippueqqittoqarnissaa pinngitsoorniarlugu Naalakkersuisut sullissivinni pineqartuni aqutsinermik sukaterisimapput kiisalu 2002-imi taakkununnga aningaasaliissutit ilassutissaannik Inatsisartut Aningaasaqarnermut Ataatsimiititaliaannut qinnuteqarsimallutik.

Suliaq Naalakkersuisut Aningaasaqarnermullu Ataatsimiititaliap akornanni pingasoriarlugu uterteqattaarneqarsimavoq, suliallu ingerlanerani Aningaasaqarnermut Ataatsimiititaliap innersuussutigisarsimasai naapertorlugit Naalakkersuisut qinnuteqaatertik iluarsisarpaat. Aningaasaqarnermullu Ataatsimiititaliap Naalakkersuisut qinnuteqaataat inaarutaasoq ulloq 25. juli 2002 akueraat.

Isumagisarialinnik ulloq unnuarlu paaqqinnittarfinnut aningaasaliissutit 30 mio. kr.-ingajannik amerleriarput. Taakku aningaasassaqartinneqalersimapput ilaatigut pinaveersaartitsinerup suliffeqarnermullu tunngasut ileqqaarfiginerisigut, ilaatigullu ingerlatsinermut sillimmatit atorlugit kiisalu akiliutit qaffanneqarnerisigut. Akiliutit qaffaatissarigalui appaamisinniarlugit Aningaasaqarnermut Ataatsimiitaliap Nunatta Karsiata tapiissutissaanut 7,7 mio. kr.-inut aningaasaliissutissat akueraat. Akiliutit apparnissaannut tapiissutissat akuerineqareerneratigut maanna akiliutit 17 procentimik qaffariartussanngorput.

Ulloq unnuarlu paaqqinnittarfinnut aningaasaliissutit qaffaataat tamakkerlugit Nunatta Karsianit aningaasalersorneqarnissaat Naalakkersuisut siunnersuutigeqqaaraluarpaat. Aningaasaqarnermullu Ataatsimiititaliaq tamatumunnga akuersiumanngilaq. Taarsiullugulu oqaatigineqartutut aaqqiisoqarpoq.

Ilinniartitaanermut tunngasuni ilinniarfiit ingerlaqqiffiusut, Nunatta Atuagaateqarfia kiisalu meeqqat atuarfianni immikkut atuartitsineq katillugit 14 mio. kr.-inik amerlanerusunik aningaasaliiffigineqarput. Taakku matussutissaat inuussutissarsiornermut atuarfiit, kulturimut tunngasut ilinniagaqarnersiutillu ileqqaarfigineqarnerisigut nassaarineqarput. Kulturimut tunngasut soorlu aviisit siammarneqarnerinut tapiissutit aammalu nuusiortitsiviit NBC-imut akiliutaannut tapiissutit ikililerneqarput 2002-imi atorneqartussat 2001-imi atorneqarsimasutut amerlassuseqartussanngorlugit. Ilassutit aningaasaliissutit isumannaarneqarsimalernerat kiisalu  isumaginninnikkut ilinniartitaanikkullu sullissiviit 2002-imi isumannaatsumik ingerlanneqartussanngornerat Naalakkersuisunit nuannaarutigineqarpoq.

Sukumiinerusumik paasisaqarumaguit saaffigiuk Aningaasaqarnermut Pisortaqarfiup pisortaa Peter Beck oqarasuaat 34 50 00 atorlugu.