Inuussutissarsiutinut attaveqaatinullu tapiissutit ikilisinneqarput taamaaqataanillu ilinniartitaanermut tunngasut pitsanngorsaavigineqarsimallutik.
2008-imut aningaasanut inatsisissatut siunnersuummi atuinerup allanngortinneqarsimanera Naalakkersuisut ingerlateqqinniarlugu ilungersussapput ilinniartitaanermut aningaasaliissutaasut sapinngissamik annerpaamik kinguneqarniassammata.
Inuussutissarsiornermik ineriartortitsinissamut ukiorpassuanngortuni aatsaat taama pitsaatigisunik atugassaqalersimavugut. Uagullu qularnaagassarput tassaavoq periarfissat atorluarneqarnissaat. Taamaaliussaagut atugarissaarneq, suliffinnik pitsaanerusunik pilersitsineq aammalu aningaasarsiornikkut immitsinnut napatinnerulersinnaanissarput qularnaarumallugu.
Naalakkersuisut aalajangersimapput suliniutit Nunatta Karsiata nutaamik isertitaqaatigilersinnaasai 2008-imut Aningaasanut Inatsisikkut salliutinniarlugit. Taamaammat aatsitassarsiornikkut suliffissuarnilu nukimmik annertuumik atuiffiusariaqartuni inuussutissarsiornikkut periarfissat nutaat ineriartortinneqarnerannut aningaasaliissutaasartut amerlineqarnissaat naalakkersuisunit siunnersuutigineqarpoq.
Kalaallit Nunaat 2004-imili aningaasarsiornikkut ingerlalluarsimavoq. Taamaalillunilu Nunatta Karsiata ukiut kingulliit pingasut akileraarutinit isertitarisartagai ukiumut 5%-imik qaffariartarsimaput suliffissaaleqinerlu annikilliartorsimalluni.
Piffissami tassani aningaasarsiornikkut siuariartorneq Nunatta Karsiata aningaasaqarneranik pitsannguallatsitsisimanngilaq. Namminersornerullutik Oqartussat ingerlatsinermut aningaasartuutaat isertitaniit amerleriarnerupput. Tamanna ilaatigut ilaqutariinnut meerartalinnut tunniuttakkat utoqqalinersiallu amerlinerannik 2007-imi upernaakkut ataatsimiinnermi Inatsisartut akuerisaannik pissuteqarpoq.
Naalakkersuisut 2008-imut Aningaasanut Inatsimmi 295 mio. kr.-inik amigartooruteqarnissamik missingersuusiorput, ukiunilu missingersuusiorfiugallartuni 2009-2011 agguaqatigiissillugu 134 mio. kr.-inik sinneqartooruteqarnissamik missingersuusiorlutik.
Annerusumik paasiniaaniaruit saaffissaq: Aningaasaqarnermut naalakkersuisoq Aleqa Hammond tlf. +299 34 50 00
Aningaasanut inatsisissatut siunnersuut 2008 pillugu nalinginnaasumik nassuiaatit