Akileraaruserinermik sullissinerup 1. januar 2007-mit allanngortinneqarnissaa qitiusumillu ingerlanneqalernissaa Inatsisartut aalajangerpaat
Akileraaruserinermik innuttaasut sullinneqarnerat pisariillisarneqassaaq pitsanngorsarneqassallunilu. Taama Inatsisartut ukiaq ataatsimiinnerminni akileraaruserinermik sullissinerup allanngortiterneqarnissaannik aalajangeramik siunertaqarput. Akileraartarnermut Pisortaqarfiup akileraaruserinermik akitsuutilerinermillu sullissineq ukiortaamit suliassarilissavaa. Tamanna sioqqullugu kommuninit akisussaaffigineqarsimagaluarpoq, ukiulli massuma naanerani kommunini akileraartarnermut allaffiit matuneqassapput.
Illit innuttaasutut siunissami Akileraartarnermut Pisortaqarfimmut saaffiginnittalissaatit. Qitiusumik allaffeqarfik nuummiissaaq. Immikkoortortami allaffeqarfiit Qaqortumi, Nuummi, Sisimiuni Ilulissanilu inissisimassapput, taakkuussappullu illoqarfiit sinnerinik nunaqarfinnillu sullissisussat (illoqarfiit immikkoortortanut agguarneqarnerat takuuk).
Kommunini immikkoortortaqarfeqanngitsuni akileraarutit akitsuutillu pillugit innuttaasut suliffeqarfiillu saaffiginnikkaangata paasissutissiinissamut ilitsersuinissamullu kommunit Akileraartarnermut Pisortaqarfimmit isumaqatigiissuteqarfigineqarsimapput.
Tamassuma saniatigut sumiiffinni pineqartuni atortorissaarutit nutaaliat ikkussuunneqassapput, taamalu immikkut allaffeqarfeqanngikkaluarluni sumiiffigisamit immikkoortortaqarfimmut toqqaannartumik attaveqartoqarsinnaassaaq.
Immikkoortortaqarfiit avataanni illoqarfinni nunaqarfinnilu Alluitsup Paani, Kangerlussuarmi, Niaqornaarsummi, Kullorsuarmi Kuummiunilu kommunit allaffiini oqarasuaammik assiliissutitalimmik/, telefaximik allanillu ikkussisoqassaaq immikkoortortaqarfigisamut qitiusoqarfimmulluunniit toqqaannartumik attaveqartoqarsinnaanngorlugu. Nunaqarfiit sinnerini massakkutulli nunaqarfinni kommunit allaffiinit oqarasuaat atorlugu attaveqartoqarsinnaassaaq.
Nunaqarfiit atortorissaarusersuiffigineqartussat 2007-imi januarimi aatsaat atortorissaarutinik ikkussuivigineqassapput.
Akileraaruseriffik nutaaq pillugu paasisaqarnerorusukkuit www.akipi.gl/akileraaruseriffik misissuiffigisinnaavat.
Illoqarfiit immikkoortortanut agguarneri
Immikkoortortaqarfik Qaqortoq
Nanortalik
Narsaq
Paamiut
Qaqortoq
Immikkoortortaqarfik Nuuk
Ittoqqortoormiut
Ivittuut
Pituffik
Qaanaaq
Nuuk
Immikkoortortaqarfik Sisimiut
Maniitsoq
Kangaatsiaq
Aasiaat
Sisimiut
Immikkoortortaqarfik Ilulissat
Upernavik
Uummannaq
Qasigiannguit
Qeqertarsuaq
Ilulissat