Nittartakkap siunertai

Namminersornerullutik Oqartussat nittartagaata nutarsarnissaanut atatillugu siunertaasoq pingaarnerpaaq tassaavoq atuisunut atoruminarsarnissaa. Nittartakkap atuisartut saaffiginiagai amerlanerpaat toqqaannartumik angujumallugit qulequtakkaartumillusooq paasissutissanik ujartuisinnaanissaq anguniarneqarpoq. Nanup saaffiginiagai nittartakkanut allanut sanilliullugu amerlasoorsuupput. Paasissutissat amerlasoorpassuit iserfigineqarsinnaanerisa pisariillisarneqarnissaa pisariaqavissimavoq. Saaffiginiakkat paasissutissanik Namminersornerullutik Oqartussanut Kalaallit Nunaannullu tunngassuteqartunik pisariaqartitsisut amerlasoorpassuit kiffartuunneqarnissaat pitsanngorsarniarlugu ujartuisinnaanermik aammalu paasissutissanut ”isaaviit” arlaqarnerusut pilersissimavagut.

Naalakkersuisut politikkikkut suliuniutaasa erseqqinnerusumik saqqumilaartinneqarnissaat nittartakkap nutaap isikkuata allatut aaqqiivigineragut anguniarparput. Maanna Naalakkersuisoqarfiit anguniakkaminnik saqqumilaartitsinissaminnut periarfissagissaarnerulerput.

Nittartakkami nutaamissaaq innuttaasut toqqaannarnerusumik sullineqarnissaannik periarfissiivugut, tuugassaq ”Innuttaasunut” periarfissaalerluni. Tassani innuttaasut paasissutissanik inuunerminnut attuumassuteqartunik toqqaannartumik pissarsisinnaalissapput.

Nittartaq Nanoq Namminersornerullutik Oqartussat taamatullu Kalaallit Nunaata avammut kiinaraa. Tuugassaq ”Kalaallit Nunaat” atuisartunut Kalaallit Nunaata avataaniittunut imaluunniit ilinniagaqartunut Kalaallit Nunaannut tunngassuteqartunik paasissutissanik piuminarsakkanik pissarsinissaminnut periarfissinneqarput.

Nittartakkap periarfissiissutaasa allat Namminersornerullutik Oqartussat ammanerusumik periuseqartilissavaat suliniutaasullu saqqumilaartinnerulissallugit. Tusarniaavimmi inatsisissat tusarniutigineqartut tusarniarfigineqartullu akissutaat atuarneqarsinnaalissapput. Saqqummersitat ataanni nassuiaatit, nalunaarutit assigisaallu katersorneqassapput nassaariuminarsagaallutillu.

Tamakkiisumik isigalugu paasissutissanik allersinnaaneq pitsanngorsarneqassaaq. Nittartagaq nutaaq ujarliumik pitsaanerusumik sukkanerusumillu atortuligaavoq. Peqatigitillugu quppernernut atatillugu inuit saaffigineqarsinnaasut pissarsiarineqariaannanngortussaapput.

• Anguniagaq

Innuttaasut allallu apeqqutigisaminnut sukkasuumik pisariunngitsumillu akissutissarsisarnissaat.

• Takorluuguaq

Namminersornerullutik Oqartussani politikkikkut anguniagaasut qitiutillugit Kalaallit Nunaanni nittartakkanit tamanit nittartagaq innuttaasunut qanilaarnerpaaq, atoruminarnerpaaq paasiuminarluartorlu pilersissallugu. Nittartagaq pitsaasuussaaq, imarisamigut nutarsagaajuartoq ilutsimigullu nutaaliortuusoq.