Nanoq nutaaq saqqummerpoq

Nittartagaq nutaaq Nanoq.gl-p oqaluttuarisaanerani aallarniutaavoq nutaaq, tassami paasissutissanut ”iserfissat” allatorluinnaq nutaarluinnarmik aaqqissuunneqarnikuupput. Nanumi nutaami anguniagaq pingaarnerpaaq tassaavoq atuisunut ajunnginnerpaamik atoruminartuunissaa. Innuttaasut paasissutissanik atugassaminnik sukkasuumik pisariunngitsumillu ujarlersinnaallutillu aallarsinnaassapput. Maanna Nanumi nutaami periarfissaalerpoq paasissutissat ujartorniakkat qulequttat aallaaviginerullugit nassaarisinnaanissaannut. Nanutoqqami paasissutissanik ujarlerniaraanni amerlasuutigut Naalakkersuisoqarfiit sorliit ataanni paasissutissat sumiissinnaanerat ilisimasariaqarnikuuvoq nittartagatoqarmi Namminersornerullutik Oqartussat aaqqissuussaanerat naapertorlugu sanaajunikuummat. Peqatigillugu Nanumi nutaami Naalakkersuisunut periarfissaalerpoq politikkikkut anguniakkanik malunnaateqarluartumik saqqumilaartitsisinnaalerneq.

Nittartakkami nutaami aamma anguniarparput Namminersornerusuni inatsisissatigut suliniutit malinnaaffigineqarsinnaalernissaat. Inatsisartut kissaataat naapertorlugu nutaatut taallugu ”Tusarniaavik” periarfissaalerpoq. Innuttaasut, suliffeqarfiit suliniaqatigiiffiillu soqutiginnittut Tusarniaavikkoortumik inatsisissat nutaat tusarniutigineqartut tusarniakkallu akissutaannik malinnaasinnaanngussapput, suliniutaasummi innuttaasut ataasiakkaarluta ulluinnarni inuunitsinnut kinguneqartussaammata. Inatsisartut taama kusanartigisumik siunnersuuteqarnermikkut innuttaasut tamarmik inatsisiliornermi pitsaanerusumik malinnaatinneqarnissaannik ammaassipput taamaalillunilu kikkut tamat oqartussaaqataanerisa ineriartorteqqinneqarnissaannittaaq aammasseqataallutik.

Periarfissaq alla nutaaq tassaavoq taaguuteqartoq rss-system. Tassani innuttaasut periarfissaqalerput Namminersornerullutik Oqartussaniit nutaarsiassanik mail-iminnut toqqaannartumik nassiunneqartartunik pisartagaqalernissaminnut. Taamaaliniaraanni qarasaasiarisaq rss-inik ”atuaasinnaasariaqassaaq”. Qarasaasiat nutaajunerut taama ittumik peqareertarput, taamaatumillu programmiuteqanngikkut internet-ikkoorlugu ”aallersinnaavutit”.

Nittartakkakkut nutaakkut anguniagaq alla tassaavoq Kalaallit Nunaata issittumi nuna ineriartorfiulluartutut avammut nittarsaannissaa. Tamanna nittartakkamik moderniusumik takujuminartumillu peqarnitsigut ersersinniarparput, sapinngisamik nunatsinnik alianaaginnanngitsumik kisiannili aamma inuinik eqeersimaarluartunik assitigut takutitsiniarluta. Inuiannguuvugummi ikittuinnaat, kisiannili nutaanik anguniagaqartuartut.

Nittartagaq nutaaq allatut ajornaraluartumik aallarnisarnermini tusiapilaartussaavoq. Nanoq Kalaallit Nunaanni nittartakkat anginerit ilagaat immaqaluunniimmi anginersaavoq. Quppernerpassuaqarpoq ullumilu avammut saqqummiunnerani quppernerit tamarluinnarmik naammassineqarlutik ajunnginnerpaamik suli aaqqinneqarsimanngillat. Ajoraluartumik kalaallisoortaa qallunaatuuanut sanilliullugu tusiapinneraaq. Tamanna erseqqissumik nassuerutigaarput. Taamaattoqarneranut peqqutaavoq Naalakkersuisoqarfinni nittartagalerisut amerlanerpaat qallunaatuinnaq oqaaseqartuummata quppernerillu kalaallisuunngortillugit nutserneqarneri tamakkiisumik malinnaasinnaasimanngillat. Tamanna sulissutigaarput piffissamilu aggersumi qanittumi tamatuma aaqqiivigineqarnissaa ilungersuutigaarput.

Inatsisartut nittartagaat ajoraluartumik suli nutarsaavigineqanngilaq. Inatsisisartut nittartagaat Nanup iluani nittartakkat anginerpaartaraat qupperneqarnerpaajulluni. Nittartagaq taanna Nanup pisoqartaata ataaniiginnarallassaaq iserfigineqarsinnaassallunili. Aamma inatsisinut tunngassuteqartortai taama aqqiivigineqarallarput. Inatsisinut tunngatillugu aaqqiissutissaq database nutaaq suliarineqaleruttorpoq naatsorsuutigaarpullu ukiup matuma naannginnerani naammassineqarnissaa.

Nittartakkap Nanup pitsanngorsartuarnissaa soorunalimi atuisut peqatiglluinnarlugit suliniutigiuarparput. Maannamut atuisartuusut Nanumi paasissutissat akornuteqaraangata amigaateqaraangataluunniit ilisimatitsiuartarput, tamatuma ingerlaannarnissaa kissaatiginaqaaq – ilissimi pillusi sullissivugut.

Nanoq nutaaq atorluarisiuk.

Emma Kristensen

Namminersornerullutik Oqartussani paasissutissiisarnermi pisortaq
Tusagassiivik