Qinersinerit inatsisitigut tunngavii:
Inatsisartunut qinersisarnerit Kalaallit Nunaanni Inatsisartunut qinersisarneq pillugu Inatsisartut inatsisaat nr. 9, 31. oktober 1996-imeersumi aalajangersaqqapput, Inatsisartut inatsisaat nr. 10, 30. oktober 1998 Kalaallit Nunaanni Inatsisartunut qinersisarneq pillugu Inatsisartut inatsisaanni allanngortinneqartumi.
Inatsisartunut ilaasortat ukiuni sisamani ilaasortaasussatut qinigaassarput. Qinigaaffik ullormit qinersiffimmit naatsorsuunneqartarpoq. Qinersinissaq Naalakkersuisut Siulittaasuanit aalajangerneqartarpoq.
Qinersinerup aqunneqarnera:
Inatsisartunut qinersinerit Qinersinermut Ataatsimiititaliamit aqunneqartarput. Qinersinermut Ataatsimiititaliaq Namminersornerullutik Oqartussat pisortaaneranit, Kanukoka"p pisortaanit biskoppimiillu ilaasortaaffigineqarpoq.
Kommunini tamani qinersinerit Qinersinermut Siulersuisunit (tassa Valgbestyrelsit) piareersarneqartarput aqunneqartarlutillu. Qinersinermut Siulersuisut borgmesterimit (siulittaasoq) aamma minnerpaamik kommunalbestyrelsimut ilaasortanit marlunnit kommunalbestyrelsimit toqqarneqartunit ilaasortaaffigineqarpoq.
Taasiartorfinni ataasiakkaani qinersinerit Qinersinermik Siulersuisumit (tassa Afstemningsleder-imit) ikortaanniillu aqunneqartarput.
Kikkut Inatsisartunut qinersisinnaatitaappat?
Inatsisartunut qinerseqataasinnaassagaanni qinersisussat allassimaffianni ilanngunneqarsimasariaqarpoq. Qinersisussat allassimaffianni ilanngunneqarnissamut piumasaqaataapput:
a) qallunaatut innuttaassuseqarneq,
b) kingusinnerpaamik ulloq qinersivimmi 18-inik ukioqalersimanissaq,
c) ulloq qinersivimmi aalajangersimasumik Kalaallit Nunaanni najugaqarsimanissaq aamma ulloq qinersivissaq sioqqullugu sivikinnerpaamik qaammatini arfinilinni aalajangersimasumik Kalaallit Nunaanni najugaqarsimanissaq, aamma
d) nammineersinnaajunnaarsitaasimannginnissaq.
Kalaallit Nunaata avataaniikkallartunut (ilinniagallit, Danmarkimi napparsimavissuarni uninngasut, nunani allani feriartut, il.il.) qinersisinnaatitaaneq:
Qinersinermut Siulersuisunut qulaani c)-mi najugaqarnissamik piumasaqaammik naammassinnissimanngitsut immikkut qinnuteqareernerup kingorna qinersisartut allassimaffiannut ilanngunneqarsinnaapput. Ukualu qulaani piumasaqaatini a) - d)-nik naammassinnissimasut Kalaallit Nunaata avataani utaqqiisaagallartumik najugaqartut taakkulu inooqataat pineqarput:
1) Kalaallit Nutaata avataani ilinniagaqarlutik najugaqartut
2) Peqqissuseq pissutigalugu Kalaallit Nunaata avataani najugaqartut
3) Folketingimi ilaasortatut sulinertik pissutagalugu Danmarkimi najugaqartut
4) Namminersornerullutik Oqartussat sinniisaattut nunani allani najugaqartut
5) Inuit Kalaallit Nunaannut attaveqartut piumasaqaatini 1) - 4)-mi sanilliunneqarsinnaasut
Qulaani inuit pineqartut qinersisartut allattorsimaffiannut taamaallaat ilanngunneqarsinnaapput Kalaallit Nunaanni inuit nalunaarsorneqarfiini/folkeregisterini minnerpaamik ukiuni marlunni nuunnginnerminni nalunaarsorneqarsimappata. Katinneqaratik inooqatigiittut katissimasutuulli nuunnginnerminni inooqatigiissimasut nallersuunneqartarput.
Kalaallit Nunaata avataaniikkallartut qinersisartut allattorsimaffianni ilanngunneqarnissamik qinnuteqarsinnaaneri:
Qinersisartut Kalaallit Nunaata avataani najugaqarallartut inatsisitigullu qinersisinnaanermik naammassinnissimasut qinersisartut allattorsimaffianni kingullermik inuit nalunaarsorneqarfimmi/folkeregisterimi nalunaarsorneqarfiusimasumi ilanngunneqartarput. Qinnuteqaat kommunemi Qinersinermut Siulersuisunut tunniunneqassaaq, imaluunniit kommunit aggorneqarnerisa avataanni najugaqaraanni (Pituffik, Nationalpark-imi silasiorfiit il.il.) Nuup Kommuneqanut tunniunneqassalluni. Qinersinermi Siulersuisut aalajangigaat sap. ak. marluk qaangiutsinnagu Qinersinermi Ataatsimiititaliamut naammagittaalliutigineqarsinnaavoq.
Qinersisartut allattorsimaffianni ilanngunneqarneq aalajangiinermiit ukiuni marlunni atuuttarpoq.
Qinersisartut allattorsimaffianni ilanngunneqarneqarnissamik qinnuteqarnermi immersugassaq pdf-inngorlugu una torrlugu aasinnaavat. Pingaarutilik: Qinnuteqaat kingullermik inuit nalunaarsorsimaffiannut/folkeregisterimut nalunaarsorneqarneqarfimmut nassiutissavat. Qinnuteqaat qinersisoqarnissaa sap. ak. arfinillit sioqqullugu kommunimit tiguneqareersimassaaq.
Qinersisartut allattorsimaffii:
Qinersisoqarnissaanik suaarutigineqaraangat Qinersinermut Siulersuisut Qinersisartut allattorsimaffiat suliarisarpaat.
Kinaluunniit qinersisinnaatitaanngilaq qinersisussat allassimaffianni ilanngunneqarsimanngikkuni, tassa imaappoq kommunimi pineqartumi qinersisartut eqquutsissimassavaat piumasaqaatit makku:
1) ulloq qinersivissaq kingusinnerpaamik sap. akunneri arfinilinnik sioqqullugu kommunimut nuussimanissaq kingusinnerpaamillu ullormi tassani nuunnermik kommunip inuit aqqinik nalunaarsuiffianut nalunaarsimanissaq,
2) ulloq qinersivissaq kingusinnerpaamik sap. akunneri arfinilinnik sioqqullugu kommunip iluani nuussimasut kingusinnerpaamillu ullormi tassani nuunnermik kommunimi inuit aqqisa nalunaarsorsimaffiannut nalunaarsimasut najugarilikkaminni nutaami allassimallutik qinersisussat allassimaffianni ilanngunneqassapput,
3) ulloq qinersivissaq kingusinnerpaamik sap. akunnerisa arfinillit iluanni kommunimut allamut imaluuniit kommunip iluani nuussimasut imaluunniit ullormit tassannga kingusinnerusumik nuunnerminnik nalunaaruteqarsimasut najugarisimasaminni najugalittut qinersisussat allassimaffianninalunaarsorneqarsimassapput.
4) Kalaallit Nunaata avataanni najugaqarallartut § 2-milu piumasaqaatinik eqquutsitsisut ulloq qinersivissaq kingusinnerpaamik sap. akunnerinik arfinilinnik sioqqullugu tamatuminnga aalajangiiffigineqarsimasut qinersisussat allassimaffiannut ilanngunneqassapput
Inatsisartunut qinersinermi ilitsersuut aamma takusinnaavat, pdf-inngorlugu aajuk una toorlugu.