Qinersinissani qinerseqataasinnaatitaassagaanni qinersisartut allassimaffianni ilanngunneqarsimasariaqarpoq.
Qinersisartut allassimaffianni ilanngunneqassagaanni piumasaqaataapput:
-
kingusinnerpaamik ullormi qinersivissami 18-inik ukioqalereersimanissaq nammineersinnaajunnaarsitaasimannginnissarlu
-
kommunimi pineqartumi qinersinissaq kingusinnerpaamik sap. akunnerinik 6 sioqqullugu aalajangersimasumik najugaqartuunissaq
-
aamma
a) qallunaatut innuttaassuseqarneq aammalu qinersinissaq sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasuunissaq,
imaluunniit
b) qinersinissaq sioqqullugu sivikinnerpaamik ukiuni pingasuni naalagaaffimmi aamma sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasuunissaq.
Ulloq qinersivissaq aalajangerneqareerpat qinersinermik siulersuisut inuit kingusinnerpaamik ullormi qinersivissami qinersisinnaatitaasutut piumasaqaatinik eqquutsitsisut kiisalu qinersivimmi pineqartumi inuit aqqisa nalunaarsorsimaffiannut nalunaarsimasut kikkuunerinik allattuiffiit suliarissavai.
- Qinersisussat allattorsimaffianni ilaatinneqassapput inuit qinersinissaq sioqqullugu kingusinnerpaamik sap. akunnerisa arfinilissaanni qinersivimmut nuussimasut aammalu kingusinnerpaamik ulloq taanna nuunnerminnik kommunimi inuit aqqisa nalunaarsorsimaffiannut allatsissimasut
- Qinersisartut qinersinissaq sioqqullugu kingusinnerpaamik sap. akunnerisa arfinilissaanni qinersiviup iluani nuussimasut aammalu kingusinnerpaamik ulloq taanna nuunnerminnik kommunimi inuit aqqisa nalunaarsorsimaffiannut allatsissimasut najugarilikkaminni allassimallutik qinersisussat allassimaffiannut ilanngunneqassapput
- Qinersisartut qinersinissaq sioqqullugu kingusinnerpaamik sap. akunnerisa arfinillit iluanni qinersiviup iluani nuussimasut imaluunniit ullormi tassannga kingusinnerusumi nuunnerminnik nalunaaruteqarsimasut najugarisimasaminni najugalittut qinersisussat allattorsimaffianni nalunaarsorneqassapput
- Qinersisartut qinersinissaq sioqqullugu kingusinnerpaamik sap. akunnerisa arfinillit iluanni qinersiviup avataani aalajangersimasumik najugaqarsimasut qinersinermik siulersuisunit qinersisussat allattorsimaffiannit peerneqassapput
Qinersisussat allassimaffiat qinersiviup iluani taasiartorfiit ataasiakkaat tamaasa immikkoortortanngorlugit suliarineqartarput.
Kommunalbestyrelsimut qinersinermi kommunit tamarmik qinersivik ataasiupput.
Qinersiviit taasiartortarfiillu nalunaarsorneqarneri Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Namminersornerullutik Oqartussat nalunaarutaat nr. 1, 24. januar 2005-imeersumi takuneqarsinnaapput.