1.4 Inuiaqatigiit kalaallit nunasiaajunnaariartornerlu

Namminersorneq pillugu Isumalioqatigiissitat isumaqarput inatsisitigut tunngavissat nunasiaajunnaariartornerup ingerlanerani aalajangersakkat tamakkiisumik imminut aqussinnaatitaanerup atornissaanut tunngavissaatitaasut inuiaat kalaallit tamakkerlugit naammassisimagaat:
·          Nuna immikkuullarilluinnartumik inissisimavoq. nunasiaajunnaarnermi immamik immikkooruteqarneq atuuppoq.
·          Namminerisamik kinaassuseqarneq kultureqarnerlu immikkut kinaassuseqarluni oqaluttuarisaallunilu, namminerisanik oqaaseqarluni allanillu immikkut inuiattut ilisarnaateqarluni.
·          Sivisuumik nunasiatut aqunneqarneq, tamannalu uppernarsarneqarpoq FN-ip inatsisaani tunngaviusuni nunat ilaasa imminnut aqutarinngitsut allattorsimaffiannut ilaagami.
·          Namminersornerulerneq pillugu inatsimmi paragrafimi oqaaseq atorneqartoq "immikkut inuiaqatigiiffiuvoq" tamakkiisumik imminut aqussinnaanermut tunngatillugu inuiaat tamat inatsisaanni oqariartaatsimik takutitsivoq. Inatsimmullu tassunga aallaqqaasiussami innersuunneqarput inuiaassutsimi, kulturimi nunagisamilu pissutsit immikkut ittut.
·          Danskit inatsisaanni, allaffissornikkut ingerlatsinerini nunanullu allanut tunngasuni pingaarutilinni immikkut pineqarneq (assersuutigalugu Kalaallit Nunaata nammineq piumasaralugu EU-mut ilaasortaannginnera, nunap immikkoortuisa kattuffiini ilaasortaaneq, isumaqatigiissutini danskit akuerisaanni ilaaqqusaannginneq ilanngunneqannginnerluunniit il.il.) kiisalu ilisarnaatinut tunngasut (assersuutigalugu erfalasoq, frimærkit il.il.)
Siuliini taaneqartut innersuussutigalugit Namminersorneq pillugu Isumalioqatigiissitat isumaqarput inuiaat kalaallit inuiaat tamat inatsisaannut tunngatillugu inuiattut isigineqarnissamut piumasaasut tamaasa naammassisimagaat. Tamatuma peqatigisaanik inuiaat kalaallit nunap inoqqaavisut imminnut isigipput nunat inoqqaavi allat peqatigilluinnarlugit.
Namminersorneq pillugu Isumalioqatigiissitat sulinerminni malugaat 1953-imi inatsisit tunngaviusut allanngortinneqarnerat Kalaallit Nunaata naligititaasutut danskit naalagaaffiannut ilanngutitaaneranik ilaqartoq sioqqullugu danskit naalagaaffiata inuiaat kalaallit periarfississimanngikkai danskit naalagaaffianniit avissaarsinnaanerup isummerfiginissaanut. Tamanna tunngavigalugu Isumalioqatigiissitat naalakkersuisunut kaammattuutigissavaat 1953-imi inatsisit tunngaviusut allanngortinneqarnerannut tunngasut qulaajaqqullugit.
Nunat inoqqaavisa immikkut ajornartorsiutigaat ataannarnissaminnut tunngavissaqartuarnissartik pisinnaatitaaffimmillu illersorneqarnissaat. Taamaattumik kalaallit immikkut suliniuteqarnissaat pisariaqarpoq.
Namminersorneruneq pillugu inatsimmi atuuttumi Kalaallit Nunaat "immikkut inuiaqatigiiffiuvoq danskit naalagaaffiata iluani." Namminersorneq pillugu Isumalioqatigiissitat isumaat malillugu tamanna imatut paasisariaqarpoq namminersornerulerneq pillugu inatsimmi inuiaat kalaallit FN-ip paasinnittaasia atussagaanni inuiattut tamakkiisumik akuerineqanngitsut, taamaallaalli "immikkut inuiaqatigiittut" akuerisaallutik.
Matuma siuliini patsisigisat tunngavigalugit Namminersorneq pillugu Isumalioqatigiissitat taamaattumik isumaqarput nunat inoqqaavisa pisinnaatitaaffiini ullumikkut pineqartoq tassaasoq naalagaaffiup iluani ikinnerussutillit illersugaanerat, tamatumalu kingunerigaa tamakkiisumik imminnut aalajangiiffigisinnaanerup mattunneqarsimanera.
Danskit nunanut allanut ministereqarfiat aperineqarluni Inatsisini tunngaviusuni § 1 innersuussutigalugu akivoq "Kunngeqarfik Danmark inuiaat tamat inatsisaanni ataasiusoq"; Namminersorneq pillugu Isumalioqatigiissitalli patsisilersuutit matuma siuliiniittut innersuussutigalugit aalajangiusimavaat isumaqaramik inuiaat kalaallit inuiaat tamat inatsisaat malillugit inuiaasut.