Namminersorneq pillugu Isumalioqatigiissitamut suliassarititani 2000-imi januaarip ulluisa arfineq-aappaanneersuni allassimavoq:
"Isumalioqatigiissitat Kalaallit Nunaata naalagaaffeqatigiinnerup iluani nammineersinnaanerata ineriartorteqqinneqarnissaanut periarfissat pillugit isumaliutissiissusiornissamik suliakkerneqarput, sulinerminni pisinnaatitaaffiit pisussaaffiillu oqimaaqatigiinnissaat tunngavigalugu:
Isumalioqatigiissitat Namminersornerulluni Oqartussaanerup inatsisit tunngaviusut aallaavigalugit qanoq inissisimanera misissussavaat - tamatumunnga naalagaaffiup Namminersornerullutillu Oqartussat akornanni oqartussaanikkut pisussaaffitsigullu agguaassisimaneq ilanngullugu - aamma naalagaaffeqatigiinnerup iluani nammineerusunnerup allatut aaqqissuussinikkut pitsaanerusumik naammassineqarsinnaanera misissuiffigineqarlunilu allaaserineqassaaq.
Isumalioqatigiissitat aningaasarsiornikkut annertunerusumik imminut pilersorsinnaaneq anguniarlugu periarfissanik siunnersuusiussaaq, ataatsimoortumik naalagaaffimmiit tapiissutaasartut naatsorsorneqartarnerisa tunngavii ilanngullugit. Nunap aningaasivianiit tapiissutaasartut allaaserineqassapput allannguutaasinnaasullu isumaliutigineqassallutik.
· Isumalioqatigiissitat oqartussaaffinnik allanik Namminersornerulluni Oqartussanut nuutsinissamik pisariaqartitsineq taamaaliornikkullu iluaqutissaasinnaasut ajoqutissaasinnaasullu ilanngullugit isumaliutigissavaat.
· Isumalioqatigiissitat Namminersornerulluni Oqartussaaneq pillugu inatsimmut, inatsisinut pisinnaatitsissutinut atuuttunut kiisalu naalagaaffiup Namminersornerullutillu Oqartussat akornanni ingerlatsineq pillugu taaneqartunullu sinaakkusiussanik isumaqatigiissutinut allannguutissanik siunnersuuteqarsinnaatitaapput."
Tamatuma saniatigut suleqatigiissitap allaaserissavaa 1979-ip kingornatigut aningaasarsiornikkut inuutissarsiornikkullu ineriartorneq, tamatumunnga ilanngullugu Danmarkip Kalaallillu Nunaata akornanni aningaasatigut nuussisarnerit tungaasigut ineriartorneq.
Suleqatigiissitap misissussavaa aningaasarsiornikkut annertunerusumik imminut pilersorsinnaanerup tunngavissiornissaa siunertaralugu inatsisit, tapiissutit isumaqatigiissutillu pioreersut iluanni suliassaqarfiit sorliit tungaasigut allannguutissanik pisariaqartitsisoqarnersoq imaluunniit kissaateqartoqarnersoq.
Ilanngullugu suleqatigiissitap misissussavaa allannguutaasinnaasut suliassaqarfinnut attuumassuteqartunut tamanut qanoq kinguneqarsinnaanersut.
Suleqatigiissitaq suliassaqarfimmi iluani periarfissanik nalunaarsuissaaq Isumalioqatigiissitamut suliassarititatut nalunaarsukkani anguniagassat pingaarnerit anguneqarsinnaaqqullugit.
Naggataatigut suleqatigiissitaq periarfissat nalunaarsukkat tunngavigalugit inassuteqassaaq Isumalioqatigiissitap inaarutaasumik isumaliutissiissutissaani nalunaarsukkanit suut salliutinniarneqassanersut.
Namminersorneq pillugu Isumalioqatigiissitap ataani suleqatigiissitat tamarmik immikkut suliassaqarfimmik iluanni suleqatigiissitat allat suliaannut attuumassuteqartut aamma taputartuunneqarsinnaasut sianigissavaat.
Aammattaaq suleqatigiissitat Namminersornerullutik Oqartussat ataanni pisortaqarfiit sulinerminnut attuumassuteqartut suliaminnik pissusissamisoortumik ilisimatittassavaat.
Isumalioqatigiissitamut nalunaarusiortarneq
Suleqatigiissitaq Isumalioqatigiissitap ataatsimiinnissai tamaasa suliaminut killiffiit pillugit nalunaarusiortassaaq, apeqqutinillu Isumalioqatigiissitap tamarmiusup isumaliutigisassaanik isummerfigisassaanillu saqqummiussisassalluni. Suleqatigiissitaq Isumalioqatigiissitap ataatsimiinnissai tamaasa sivikinnerpaamik sapaatip akunnerinik marlunnik sioqqullugit Allattoqarfik aqqutigalugu Isumalioqatigiissitap ataatsimiinnissaanut soqutiginaatilittut isigineqartunik nassiussisassaaq.