Olivinisiorfiup siunissaa isumaliutigineqarpoq

Aatsitassarsioqatigiiffiup Minelco A/S-ip, Maniitsup eqqaani olivinisiorfimmik ingerlatsisup, aatsitassarsioqatigiiffiup aningaasatigut angusai naatsorsuutigisamit angusaqarnerliorfiummata, aatsitassarsiorfiup siunissaa isumaliutigineqarpoq. 

Olivinimik Europamut assartuinermi ingerlatsinermut aningaasartuutit ilaatigut qaffassinerujussui artukkiisuupput.

Olivinimik pisisartoq pingaarneq tassaavoq aatsitassarsioqatigiiffiup immikkoortortaa LKAB, (Luossavaara-Kiirunavaara Aktiebolag), svenskit naalagaaffiannit pigineqartoq.

Seqimi olivinisiorfik 2005-imili ingerlarsimavoq, 2005-imiillu 2009-mut olivinimik 1.700.000 tonsip missaanik tunisassiorsimalluni. Aatsitassarsiorfik 28-t missaannik sulisoqarpoq.

Oqartussaasut Minelco A/S-ilu aatsitassarsiorfiup siunissaa pillugu maannakkut qanimut oqaloqatigiipput. Maanna misissorneqarpoq, aatsitassarsiorfik matuneqarallassagaluarpat siunissami tunisassioqqilernissamut tunngavissaqartoqarsinnaassanersoq.

Aatsitassarsiorfiup 2005-imi pilersinneqarneranut atatillugu piumasaqaatinut ilaavoq aatsitassarsiorfiup matuneqarnissaanut pilersaarusiornissaq, taamaasilluni atortut il. il. aatsitassarsiornermi atorneqartut aatsitassarsiorfimmit piiarneqarnissaat aatsitassarsiorfiullu saligaatsuulluni qimanneqarnissaa siunertarineqarput. Matusinermi pilersaarutip piviusunngortinneqarnissaanut aningaasatigut qularnaveeqqusiisoqarsimavoq.