Aatsitassarsiornermi sulisorineqartussat qulakkeerniarlugit innersuussutit

Aatsitassanut Ikummatissanullu Pisortaqarfiup aatsitassarsiorneq pillugu Narsarsuarmi 10. januar 2008 ataatsimiititsinera aatsitassarsiornerup siuarsarneqarnissaa siunertaralu innersuussiffiulluni naammassivoq.

Nunaqavissut sulisorineqarnissaat kiisalu nunatsinni suliffiutillit siunissami aatsitassarsiornerup iluani peqataalluarnissaat anguniarlugu ataatsimeeqataasut kommunineersut, suliffeqarfinneersut, suliniaqatigiiffinneersut Namminersornerullutillu Oqartussaneersut innersuussutigineqartut allaavigalugit aatsitassarsiornerup iluani suleriaqqinnissaannik kaammattorneqarput.

Taamatut kujataani ataatsimiititsisarnerit ukiut aappassaannik ingerlanneqartut nangeqqinneqarnissaat pilersaarutaavoq. 2009-mi ataatsimiinnissami maanna ataatsimiinnermi innersuussutigineqartut innersuussutigineqartut anguniagassiissutillu killiffii nalilersorneqassapput.

Narsarsuarmiit innersuussutigineqartut sinerissami taamatut ataatsimiititsisarnerit assigalugit innersuussiffiupput. Nunap immikkoortuini aatsitassarsiorfigineqartuni aatsitassarsiorfiulerumaartunilu 2008-mi ataatsimiititsisarnissat aamma pilersaaruteqarfigineqarput.

Taamatut ataatsimiititsisarnerni siunertaavoq qulakkeerniassallugu Kalaallit Nunaanni inuiaqatigiit aatsitassarsiornernit sapinngisamik annertunerpaamik pissarsiaqaateqartarnissaat, tamannalu tassa nunaqavissunik suliffissaqartitsinermut kiisalu nunaqavissut suliffeqarfiutaasa sapinngisamik annertunerpaamik peqataatinneqarnissaannik qulakkeerinninnissaq aamma siunertaavoq.

Tamatuma saniatigut nunaqavissut aatsitassarsiornerup iluani sulisorineqarnissaat anguniarlugu ilinniartitsinerit qulakkeerneqarnissaattaaq anguniagaavoq.

Ataatsimiinnermit innersuussutaasut