Kalaallit Naalakkersuisui danskillu naalakkersuisui Aatsitassanut Ikummatissanullu ataatsimoortumik Siunnersuisoqatigiit inassuteqarnerisigut Niaqunngunap eqqaani Seqinnersuusami ingerlatseqatigiiffik Seqi Olivine A/S ukiuni 30-ni iluaquteqarnissamut akuersissuteqarfigaat.
Iluaquteqarnissamut akuersissut tunngaveqarpoq, Seqi Olivine A/S-ip olivinimik piiaasinnaanissaa, ilaatigut Europami saviminernik suliaqartarnermut atorneqartartumik.
Ingerlatseqatigiiffiup ilimagaa ukiumut minnerpaamik 1,1 mio. tonsinik piiaavimmi ammasumi piiaasarnissaq, sivikinnerpaamillu ukiuni 25-ni piiaasoqarsinnaassaaq ukiullu taakkua marloriaataannik iluaquteqarsinnaaneq ilimanaateqarsinnaalluni.
Seqi Olivine A/S Nuummi najugaqarfeqarpoq Crew Gold Corporationimillu aqutatut ingerlatseqatigiiffiulluni, Kalaallit Nunaanni Nalunaq Gold Mine A/S-imi pingaarnertut aktiaateqartutut ilisimaneqartoq. Crew Gold Corporationip Seqi Olivine A/S-ip ingerlanneqarneranut suleqatigiinnissamut Minelco AB-mik suleqatigiinnissamik isumaqatigiissuteqassangatinneqarpoq, taannaavorlu nunarsuarmi saviminermik piiaasarnermi ilaatigut anginersaasut ilagisaat. Minelco suliffeqarfissuarmut LKAB-mut ilaanermini nunarsuarmi aatsitassarsiorfinni aatsitassalerivinnilu teknologiimi siuarsimasuuvoq kiisalu nioqqutissiassat suliarinnittarnerlu pineqaraangata ilisimatusarnermik ineriartortitsinermillu annertuumik ingerlataqartuulluni.
Naalakkersuisoq Jørgen Wæver Johansen akuersissuteqarnermik nalunaaruteqarnermut atatillugu ima oqaaseqaateqarpoq:
- "Nuannaajallannartuuvoq, aatsitassanik ujarlernermi ingerlatat Kalaallit Nunaanni annertusiartornerat naammassisanik ima pitsaatigisunik takussusiimmat, maanna iluaquteqarnissamut akuersissummik allamik tunniussisinnaalluta – ukiut marlui nnaat ingerlaneranni Nalunami guultikiorfimmut akuersissummik tunniussaqarnitta kingorna. Aatsitassanik ujarlernermi ineriartorneq pitsaalluinnartoq takusinnaavarput, ukiuni tulliuttuni aatsitassanik iluaquteqarnissamut suliniutinik amerlanernik neriuuteqalersitsivoq.
Neriuppunga, Seqi Olivine A/S inuillu Crew Gold Corporationimeersut Minelcomeersullu Niaqunngunami atortussat tamarmiusut ilanngullugit ukiormanna ukiuni arlalinni piusinnaasumik piiaaviliulereernissaat. Ingerlatseqatigiiffiup pilersaarutai ukiuni tulliuttuni amerlasuuni ingerlasussaapput, sulisussaqarniarnermut iluaqutaasussamik suliffissanik nutaanik pilersitsinissamut periarfissiisussamik, pingaartumik najukkami innuttaasunut."
Paasissutissat sukumiinerusut Jørgen Wæver Johansenimut imaluunniit Aatsitassanut Ikummatissanullu Pisortaqarfimmi allaffiup pisortaanut Søren Hald Møllerimut, tlf. 34 50 00-imut saaffiginnissutigineqarsinnaapput.