Aatsitassarsiornermik suliffissuaqarfinnit aatsitassanik ujarlernissamut akuerineqarnissamik qinnuteqaatit aqqaneq marluk siunnersuisoqatigiit suliaraat. Siunnersuisoqatigiit siulittaasuat folketingimi ilaasortaq Venstremeersoq Kim Andersen oqarpoq:
- Kalaallit Nunaanni maannakkorpiaq aatsitassanik sammisaqarnerup malunnartumik annertuseriarsimanera qularnaappoq, nuannaarutissaavorlu ukiup ataatsip ingerlanerani aatsitassarsiornermik suliffissuaqarfiit ujarlernissamut aningaasaliissutitik pingasoriaatinngortissimammatigit. Taamaalillutik 2005-imi kr. 190 mio. kr.-t atorlugit ujarlertoqarsimalluni, aningaasallu Kalaallit Nunaanni atorneqartut aatsaat taama amerlatigipput.
Ujarlernissamut akuersissutit amerliartornerat 2006-imi ingerlaannarsimavoq, maannakkullu pinngoqqaatit aatsitassallu assigiinngitsut tassaasut molybdæn, aqerloq (bly), zink, rubinit, aligoqqiit (diamantit), kuulti aamma platin il.il. ujarneqarlutik.
Tassunga tunngatillugu Kim Andersenip oqaatsini ima ilavai:
- Maniitsup Kommuniani olivinisiorfiup takutippaa oqimaaqatigiissumik aatsitassarsiornermik ineriartortitsineq nunaqavissut suliffissaqarniarnerannut aningaasarsiornerannullu pitsaasumik sunniuteqarsinnaasoq. Maniitsup Kommunia aatsitassat tungaasigut soqutiginaatilerujussuuvoq. Kommunip nunataata sermeqanngitsup25 %-ia ullumikkut aatsitassarsiornissamut akuersissuteqarfigineqarpoq. Tassunga tunngatillugu immikkut taasariaqarpoq kommunimi aligoqqinnik (diamantinik) ujarlernerup ukiuni aggersuni immaqa iluaqutiginnilernissanik nutaanik nassataqarsinnaanissaa.
Siunnersuisoqatigiittaaq NunaMinerals-ip pisortaa Ole Christiansen ataatsimeeqatigaat suliffeqarfiullu ujarlerfissaa Nuup Kommuniani Niaqunngunap kujataaniittoq, maanna platinimik ujarlerfigineqartoq, takusarlugu. Aammattaaq siunnersuisoqatigiit Maniitsup Kommuniata borgmesteria Søren Lybert peqatigalugu olivinisiorfik tikeraarpaat. Maannakkorpiaq tassanngaanniit ukioq manna siullermeerutaasumik olivinimik umiarsuarmut issoraasoqarpoq.
Naggasiullugu siunnersuisoqatigiit Qeqertarsuup-Nuussuup avataata imartaani uuliasiortitsiniarnissap aallarneneqareersup ingerlalluarnera sammineqarpoq, selskabillu arlallit taakkuinnaallutik suliarinnittussatut neqerooruteqarnissaminnik kissaateqareersimapput, tassa akuersissutinik ileqquusumik qinnuteqarfissap 15. december 2006-imut killilerneqarsimasup iluani. Suliarinnittussatut uuliasioqatigiiffiit akuerineqarnissaminnik qinnuteqartut sajuppillatsitsilluni paasissutissanik katersanik annertuumik tunisaqarsimanermut sanilliukkaanni ersarilluinnartumik takuneqarsinnaavoq sumiiffik tamanna uuliasioqatigiiffinnit soqutigineqaqisoq.
Paasisaqarnerorusuttunut attavissat:
Kalaallit Nunaanni aatsitassat ikummatissallu pillugit siunnersuisoqatigiit siulittaasuat Kim Andersen, Venstremeersoq, oqarasuaat +45 33 37 45 09 imaluunniit Aatsitassanut Ikummatissanullu Pisortaqarfimmi pisortaq Jørn Skov Nielsen, oqarasuaat +299 34 68 06.
Aatsitassanut Ikummatissanullu Pisortaqarfiup nittartagaa www.bmp.gl aamma takusarneqarsinnaavoq.
