Smaa skala projekt

Aatsitassanik annikitsumik misissuinissamut akuersissuteqarnissamut assigiissaartumik piumasaqaatit amma aatsitassanik annikitsumik piiaanissamut akuersissuteqarnissamut assigiissaartumik piumasaqaatit.

Kalaallit Nunaanni Naalakkersuisut aamma Energiministerip (nukissiornermut ministeri) marts 2009-mi aatsitassanik annikitsumik ingerlataqarnissamut assigiissaartumik piumasaqaatit akuersissutigisarneri nutaat akuersissutigaat.

Assigiissaartumik piumasaqaatit nutaat nunaqavissut piiaanermik ingerlataqartut, aatsitassarsiorfissuit assigalugit aningaasanik ilisimasanillu pigisaqanngitsut suliaqarfigai. Assigiissaartumik piumasaqaatit qulakkiissavaat, annikitsumik misissuinissamut piiaanissamullu akuersissutit aatsitassanut inatsimmi aatsitassanik ingerlataqarnermi isumannaallisaanikkut, peqqissutsikkut avatangiisitigullu isumannaatsumik ingerlataqarnissaannut piumasaqaatit isumannaatsumik ingerlannissaat aamma taakkunannga eqquutsinneqarnissaat.

Assigiissaartumik piumasaqaatit nutaat aatsitassanut inatsisip § 32-ani nunaqavissut killeqartumik aatsitassanik (ujaqqanik) maannakkumutut annertutigisumik immikkut akuersissummik pissarseqqaarnani katersisinnaatitaanerat piiaasinnaatitaanerallu allanngortinngilaat.

Assigiissaartumik piumasaqaatini atuuttut pingaarnerit makkuupput:

Aatsitassanik annikitsumik misissuinissamut akuersissutit

• Akuersissut inummut namminermut tunngavoq. Inummut ataatsimut imaluunniit inunnut arlalinnut ataatsimoortunut tunniunneqarsinnaavoq
• Inuk ataaseq annikitsumik misissuinissamut akuersissutinik tallimat sinnerlugit pisinnaatitsissutinik pigisaqarsinnaanngilaq
• Pisinnaatitsissummik pigisaqartoq Kalaallit Nunaanni aalajangersimasumik najugaqartuussaaq tamakkiisumillu akileraartussaatitaassalluni, kiisalu imminut oqartusaaffigisussaavoq aammalu imminut oqartussaaffiginngitsutut pisortanit aalajangiiffigineqartussaanani
• Aatsitassat suulluunniit akuersissummut ilaapput, taamaattorli ikummatissat grunstof-illu radioaktivimik akullit ilanngunnagit
• Nunaminertaq misissuiffigineqartoq 1 km² sinnerlugu angissuseqassanngilaq, 2 km-erinillu takinerusinnaanani
• Piffissaq akuersissuteqarfiusoq ukiut marlukkaartut angullugit tunniunneqassaaq, qinnuteqaateqareernermilu sivitsorneqarsinnaalluni
• Pisinnaatitsissummik pigisaqartoq ilaatigut ingerlataminik isumaginnissanngilaq qaartiterutissanik atuinermik kinguneqartumik, periutsit akuutissanik kemiskiusunik atuilluni imaluunniit sakkut il.il. grundstoffinik radioaktiviusunik akoqartunik atuilluni isumaginnissanngilaq.
• Pisinnaatitsissummik pigisaqartup pisuussutinik suussusersisimaguni killeqarfilersuisimallunilu kiisalu misissuinissamut akuersissummi piumasaqaatit pisussaaffiillu eqquutsissimagunigit, taassuma kingorna pineqartoq piiaanissamut akuersissummik tunineqarsinnaavoq
• Akiliummik 1.000 kr.-nik akiliisoqassaaq.

Aatsitassanik annikitsumik piiaanissamut akuersissutit

• Piiaanissamut akuersissut tunniunneqarsinnaavoq, annikitsumik misissuinissamut pisinnaatitsissummik pigisaqartup pisuussutit suussusersimagunigit, misissuinissamullu akuersissummi piumasaqaatit eqquutsissimagunigit
• Annikitsumik piiaanissamut akuerineqarnissamut qinnuteqaammut pineqassaaq sumiiffik akuersissuteqarfiusoq taanna, imaluunniit taassuma ilaa, kiisalu aatsitassat misissuinissamut akuersissummiittut assingi, imaluunniit taakku ilaat
• Nunaminertaq piiaaffigineqartoq 1 km² sinnerlugu angissuseqassanngilaq, 2 km-erinillu takinerusinnaanani
• Akuersissut inummut ataatsimut imaluunniit inunnut arlalinnut ataatsimoortunut tunniunneqarsinnaavoq. Annikitsumik piiaanissamut akuersissut pisinnaatitsissummik pigisaqartumut tunniunneqassaaq imaluunniit inummut ataatsimut imaluunniit inunnut arlalinnut pisinnaatitsissummik pigisaqartup toqqagaanut
• Pisinnaatitsissummik pigisaqartoq Kalaallit Nunaanni aalajangersimasumik najugaqartuussaaq tamakkiisumillu akileraartussaatitaassalluni, kiisalu imminut oqartusaaffigisussaavoq aammalu imminut oqartussaaffiginngitsutut pisortanit aalajangiiffigineqartussaanani
• Inuk ataaseq qaammatisiutit malillugit ukiumi ataatsimi annikitsumik piiaanissamut akuersissutinik tallimat sinnerlugit pisinnaatitsissutinik pigisaqarsinnaanngilaq
• Aatsitassat suulluunniit akuersissummut ilaapput, taamaattorli ikummatissat grunstof-illu radioaktivimik akullit ilanngunnagit. Aatsitassat akuersissummut ilaatinneqartut, akuersissummi erseqqinnerusumik taaneqarsimappata, aatsitassat pineqartut tamakku taamaallaat akuersissummut ilaatinneqassapput
• Annikitsumik piiaanissamut akuersissut ukiunut 30-nut atuutissaaq
• Pisinnaatitsissummik pigisaqartoq ilaatigut ingerlataminik isumaginnissanngilaq qaartiterutissanik atuinermik kinguneqartumik, periutsit akuutissanik kemiskiusunik atuilluni imaluunniit sakkut il.il. grundstoffinik radioaktiviusunik akoqartunik atuilluni isumaginnissanngilaq.
• Akiliummik 5.000 kr.-nik akiliisoqassaaq.

Assigiissaartumik piumasaqaatit ukunini takukkit.

Aatsitassarsiornermik annikitsumik ingerlatsineq pillugu quppersagaq – aallartilluarit.

Annikitsumik misissuinissamut piiaanissamullu akuersissutinut assigiissaartumik piumasaqaatit naatsumik malinnaaffiginninneq.

Minedrift i lille skala - kom godt i gang.

Minedrift i lille skala - kom godt i gang. på grønlandsk

Tusarniaanermi akissutit

Kalaallit Nunaanni oqartussat

Qallunaat Nunaanni oqartussat