Aktiaatillip oqaasia april 2010.

Nunaminerals 2010-mi ataatsimeersuartoqarnissaanut ilanngussaq 3.
Aktiaatillip oqaasia, oqalugiartoq, Naalakkersuisoqarfimmi pisortaq Christel Lund Jæger-Hansen, april 2010.

”Aallarniutigalugu qutsavigerusuppakka Nunamineralsimi suleqataasut, pisortat siulersuisullu ukiumi qaangiuttumi suliarisimasaat pillugit. Kalaallit Nunaata siunissami inuussutissarsiutitigut ineriartornissaanut pingaarutilinnik suliaqarpusi, taamaammallu nuannerpoq takullugu, suleqatinit pimoorussisunit suliaminnullu pikkorissusilinnit ulluinnarnilu annertuumik suliaqartartunit suliassat suliarineqartut.

Naalakkersuisut maluginiarpaat, Impala Planium Holding LTD-mik, ulluinnarni taaneqartartoq ”Implats”, ingerlatsiviup peqateqarnissamik suliniuteqarnerata siumut ingerlanera ajunngitsuusoq, taamaalillunilu siunnersueqatigiinneq immikkullu ilisimasaqarneq iluaqutaasoq, allatulluunniit oqaatigalugu: atortussiassanik misissuinerup iluani misilittakkanik paarlaasseqatigiittarneq, pingaartumik Nuup eqqaani Amikumi platinisiorneq pillugu siunnerfilimmik pilersinniakkanut atatillugu, neriunaateqarluartoq.

Taakkua saniatigut nuannerpoq tusarlugu, Nuup kangerluaniittumi Qeqertarsuarmi aamma Qussummi, kiisalu Kujataaniittumi Vagarimi aamma Tunup avannaarsuaniittumi Ymer Ø-mi ingerlatsiviup pingaarnertut suliniutai assigiinngitsut siumut ingerlasut.  

Nunarsuarmi ajornartorsiorneq aamma saffiugassanut akigitinneqartut nikerarnerat eqqarsaatigalugit, kuulltit aamma wolframit pillugit ingerlatsiviup pingaarnertut suliniutai qitiutillugit iliuuseqarniarneq isumatusaarneruvoq, soorlu ingerlatsiviup siunnerfilimmik pilersinniagaanut tamanut suleqateqarnissamik ammaassineq, piffissaq ungasinnerusoq eqqarsaatigalugu Kalaallit Nunaanni atortussiassanik misissuinerup iluani NunaMineralsip ”siuttutut” inissisimaneranut nukittorsaassasoq.

Juuni 2008-mi Københavnip Fondsbørsiata allattorsimaffianut ilanngunneqarnerup ingerlatseqatigiiffik annertuumik ersarinnerulersissimavaa, kisiartaavormi Danmarkimi ingerlatseqatiigiiffittut aatsitassarsiornermi pappialanik nalilinnik niuernermi allattukkanut ilanngunneqarsimasoq. Taamaalilluni 2008-p naanerani aktiaatiliit aqqisigut taallugit allattorneqarsimasut 2000-t missaanniipput, ingerlatseqatigiiffiullu nalinga 245 mio. kr.-nut nalilerneqarpoq.

Naalakkersuisut tungaannit angusarineqarsimasut assut nuannaarutigaagut, piffissallu takutikkumaarpaa nunani allani aningaasanik niuerfinni aatsitassarsiornerup iluani inglerlatseqatigiiffinnik allattuisarnermik immikkut ilisimasalinni allattukkanut ingerlatseqatigiiffik ilanngunneqassanersoq.

Naalakkersuisut taamatut oqaaseqarlutik siulersuisut nalunaarutaa tusaatissatut tiguaat.

--- ooo 000 ooo ---

Oqaatigineqartut atuutsinneqarput