Aktiaatillip oqaaseqaataa

Naalakkersuisut 2011-mi ataatsimeersuarnermi oqariartuutissaannut inassuteqaat:

”Aallarniutigalugu ukiumi qaangiuttumi sulilluarsimanersi pillugu qujaniarpunga. Suliassaqarfik inuiaqatigiinnut pingaarutilik inissiaatileqatigiiffik, tassanilu suliat tamaasa aqqutigalugit isumagisaraarsi. Sulisut tunniusimasut pikkorissullu ulluinnarni suliassanik isumaginnilluarnerat takusinnaallugu nuannerpoq.

Inissiaatileqatigiiffik INI-p ukiumoortumik naatsorsuutai naammagisimaarnarput inissiaatileqatigiiffiullu ukiuni kingullerni angusaasa patajaatsuusimaneri angusaqarluarsimaneralu nuannaarutissaapput. Naalakkersuisut pingaartippaat erseqqissaatigissallugu Kalaallit Nunaat aningaasaqarnikkut unammilligassaqarmat imaannaanngitsunik, taamaammallu kikkut tamarmik, aamma pisortat suliffeqarfiutaat, aningaasanik eqqarsaatigilluagaasumik atorluaanissaannik piumaffigineqarmata. Pisortat aningaasaataat mianersortumik, sipaarniartumik tunuarsimaartumillu pissuseqartumik atorneqartariaqarput. Takusinnaavaralu INI-p taakkunannga isumaqatigigaatigut inuiaqatigiinnullu ajunngitsumik tunniussaqartoq.

Soorlu selskabip aningaasatigut pingaarutilinni kisitsisaataatigut naatsorsuutaanilu takuneqarsinnaasoq selskabip aningaasaqarnerata ingerlanneqarneratalu pitsanngornissaat pillugit siunniussaqarluarluni ingerlajuaannartumillu sulissutigineqartut.

A/S Inissiaatileqatigiiffiup INI-p Kalaallit Nunaanni Namminersorlutik Oqartussat sullitaasa annersaraat. Namminersorlutik Oqartussat inissiaataasa amerlanerpaartaasa ilisarnaatigaat aserfallatsaaliorneqarnermikkut ajorneri ingerlaavartumillu ingerlanneqarnerannut aningaasartuutitigut akisuneri; pissutsillu taakku Namminersorlutik Oqartussat attartugassatut inissiaataanni illumut attartornermut akiligassat agguataarsimanerini takuneqarsinnaapput. Taamaattumik Naalakkersuisut selskabilu 2010-mi suliniummik aallartitaqarsimapput Namminersorlutik Oqartussat inissiaataasa pitsaanerpaamik ingerlanneqalernissaannik angusaqarfiusussamik. Pitsaanerpaamik ingerlatsinerup kingunerissavaa illumut akiliutip ilaa anneq ingerlatsinermiit aserfallatsaaliuinermut nuunneqarsinnaanera. Akileraartarneq Atugarissaarnerlu pillugit Isumalioqatigiissitap iluanaaruteqarsinnaanerunermik innersuussisimanera pissutigalugu ingerlatsinermut iningaasartuutit sammineqarnerulernissaanik pisariaqartitsinerulernera soqutiginaateqalersippaa. Suliamut tassunga Namminersorlutik Oqartussat neriuuteqarluarput tamassumallu kinguneranik takussaasunik angusassat pillugit.

Inissiaatileqatigiiffik INI-p inuppassuit Nunatsinni sullippai taamaattumillu pingaaruteqarpoq, ingerlatseqatigiiffiup inissianik allaffissornikkut ingerlatsinermi siunnersuisinnaanermut ikorfartuisinnaanermullu piginnaasaqarnissaa. Tassunga atatillugu nuannaarutissaavoq ingerlatseqatigiiffiup ilinniartitaaneq piginnaasallu qaffassarneqarnissaat sammisarimmagit.

Ingerlatseqatigiiffiup ingerlanneqarnerata anguniagaqarluni ingerlaavartumillu sulissutigineqarnerata pitsanngorsarneqarniarnera Naalakkersuisut upperaat.

Naggasiutigalugu aammaloorlunga siulersuisut qullersaqarfiullu ukiumi qaangiuttumi sulilluarsimanerannut qujarusuppunga. Tamatumunnga peqatigitillugu qullersaqarfik qinnuigissavara ingerlatseqatigiiffimmi sulisunut ukiumi qaangiuttumi sulilluarsimanerat pillugu qujanera annertooq ingerlateqqeqqullugu.

Taamatut oqaaseqarlunga siulersuisut nalunaarutaat Naalakkersuisunit tusaatissatut tiguneqartoq nalunaarutigaara.”