Air Greenland A/S-ip ileqquusumik ataatsimeersuarnerani oqaatigineqartussat

“Aallarniutigalugu Naalakkersuisut sinnerlugit ukiumut qaangiuttumut sulianut naammassisimasassinnut qutsavigerusuppassi.

Ukioq qaangiuttoq pisarnertut Air Greenlandimut pisimasoqarfiusimaqaaq. 2010-mi ingerlatseqatigiiffik ukiunik 50-inngortorsiorluni nalliuttorsiorpoq, nuna tamakkerlugu pisisartuminut kaffillerujussuarluni.

Naalakkersuisut naammagisimaarlugu paasivaat ingerlatseqatigiiffik ukiunut tallimanut iliuusissaminut pilersaarummini, Qarsoq 2012-imi, timmisartuussisartutut unammillersinnaassuseqartutut niuernermillu sammisaqartutut soqutigisaqartoq, pitsaasumik angallassisarnermigut unammillersinnaasunillu akeqartitsinermigut niuerfigisartakkani niuerfigisinnaasanilu pigiinnarniarlugit. Ingerlatseqatigiiffiup ilisimatitsissutigaa Qarsoq 2012-ip piviusunngortikkiartorneqarnera 2010-mi pilersaarutigineqartutut ingerlasimasoq.

2010 ukiuuvortaaq timmisartortitseqatigiiffinnit allanit unammillerneqarneq pillugu oqallinnerup annertuseriarfia. Tamatumunnga tunngatillugu Naalakkersuisut naammagisimaarlugu paasivaat Air Greenlandip takutikkaa allatut aaqqissuussisinnaassuseqarnini unammilleqataalerlunilu. Ingerlatiinnarluguli akuersaarumavarput Air Greenlandip maani nunatsinni isorartoqisumi tamatsinnut angallannikkut pissutsit sapinngisamik pitsaanerpaat pilersitseqataaffigerusummagit ingerlatiinnarniarusummagillu – aammattaaq isorliunerusuni najugaqarniarlutik aalajangiussisimasunut.

Angallattakkanut suleqatigisanullu akisussaassusilimmik atoruminartumillu ingerlatseqatigiiffiujumalluni ingerlatseqatigiiffiup 2010-mi Naalagaaffiit Peqatigiit nalunaarutaat Global Compact akueraa CSR Greenlandillu pilersinneqarneranut peqataalluni.

Naalakkersuisut nuannaarutigaat ingerlatseqatigiiffik inuiaqatigiinnut akisussaassuseqarluni iliuuseqartarluni sulimmat, taamatuttaaq minnerunngitsumik sulisuminnik ilinniartitsinermikkut, tamannami kalaallinik inuiaqatigiinnik piginnaaneqarnerulersitsimmattaaq. Taamatuttaaq nuannaarutissaavoq ingerlatseqatigiiffik inuiaqatigiinnik sullissinerminik malunnartitsinermigut nutaanik niuerfigisaqartalernissaminut pitsaanerpaanik periarfissaqalermat, pingaartumik aatsitassarsiortunik sullissinermut tunngatillugu. Taamaalilluni Cougarimik suleqateqarneq kinguneqarluarsimavoq Canadamullu angallavissamik nutaamik misissuinerit ingerlatseqatigiiffiup siumut isigisuuneranut takussutissaapput.

Assartuussineq pillugu Isumalioqatigiissitap kaammattuutini tamanut saqqummiuteqqammerpai. Kaammattuutigineqartut tamakku Kalaallit Nunaanni siunissamut angallannerup qanoq ittuunissaanut taamatullumi Air Greenlandip sulineranut sulisuinullu pingaarutilerujussuupput. Pingaaruteqarpoq erseqqissassallugu Assartuussineq Pillugu Isumalioqatigiissitap kisiat suliassarimmagu inuiaqatigiit aningaasaqarnerannut tunngatillugu sianiginiagassat aallaavigalugit kaammattuuteqarnissaq. Taamaammat isumalioqatigiissitap kaammattuutiminut inuuniarnermut kulturimullu tunngasut amerlaqisut nunatsinni inuiaqatigiinnut atortulersuutit pillugit aalajangiisoqassatillugu pissusissaatut ilaaginnartariaqaraluartut ilanngussimanngilai. Tamakku naalakkersuinermik suliaqartut akisussaaffigalugillu suliassaraat uagullu Naalakkersuisuni suliassat annertuut siunissatsinniittut suliarinissaannut qilanaaqaagut.

Kalaallit Nunaanni siunissami angallannerup qanoq ittuunissaa pillugu aalajangiiniarluta suleruloornissarput maannakkut aallartippoq ukiorpaalussuarnilu ingerlassalluni. ilaannut nuannaarutaasussanik kisiannili allanut aliasuutaasunik isumanerluutaasunillu aalajangiisoqartassaaq. Inuuneq tassa taama ippoq, kisiannili kalaallinut inuiaqatigiinnut pitsaanerpaasussanik aaqqiissuteqarniarluta ilungersussaqqaarpugut.

Ukiut nikittarput atortullu atorunnaarneqartarput. Taamaalilluni Air Greenlandip timmisartorisatik Dash 7-it minnerunngitsumillu qulimiguuliutitik S61 Sikorskyt atorunnaartitileruttorpai. Allanngoriartorneq taanna timmisartuussivigisartakkanut ullumikkut S61-inik timmisartuussiviusartunut aammattaarlu SAR-imik qulimiguulinnik upalungaarsimanermut ullumikkut S61-inik atortoqartitaanerusumut arlaatigut kinguneqartussaavoq. SAR-imik qulimiguulinnik atortoqarluni upalungaarsimaneq Naalakkersuisunit malinnaavigeqqissaarneqarpoq tamakkununngalu tunngasut aaqqiivigineqarnissaat pillugu naalagaaffimmi oqartussaasut suleqatigineqalerput.

Naggasiullugu minnerunngitsumillu periarfissaq atorniarpara Air Greenlandip sulisui aqutsisuilu ulloq 4. marts 2011-mi islandimiut timmisartuata minnerliorneranut atatillugu sulilluarsimanerannut nersualaarlugit. – kisianni kusanaqaaq – Tamatumunngalu qujanaq!

Naalakkersuisut Air Greenlandip 2011-mi sammisassaqarfinnik ingerlatseqatigiiffiup 2010-mut ukiumoortumik nalunaarummini taasaanik sulinissaa malinnaavigissallugu qilanaaraat.

Naggasiullugu Naalakkersuisut sinnerlugit sulisut aqutsisullu sulilluarnissaannik kissaakkumavakka.

Taamatuttaaq siulersuisut ukiumi qaangiuttumi annertuumik suliaqarsimanerannut qutsavigissavakka.

Taamatut oqaaseqarlutik Naalakkersuisut siulersuisut nalunaarutaat tusaatissatut tiguaat.”