Nunanut Allanut Psiortaqarfiup aaqqissuussaanera

Nunanut allanut naalakkersuinikkut apeqqutit ukiuni kingullerni naalakkersuinikkut suliaqarnermi annertusiartuinnarput. Tamatuma kingunerivaa nunanut allanut kiffartuussiviup piginnaaneqarnerunissaanik kissaateqarneq. Taamaattumik nunanut allanut kiffartuussivik 2004-mi ukiortaap ulluani Nunanut Allanut Pisortaqarfinngorpoq. Naalakkersuisut taamatut nutaamik taaguussinikkut kissaatigisimavaat nunanut allanut sillimaniarnikkullu naalakkersuinikkut apeqqutit Namminersornerullutik Oqartussani susassaqarfittut annertoqatitut pingaaruteqartutullu inissisimalernissaa. Naalakkersuisut Siulittaasuata Naalakkersuisut nutaat 10. juni 2009-mi ilisaritippai. Nutaanik Naalakkesuisoqalerneratigut nunanut allanut tunngasuni suliassaqarfik qitiusumut inissinneqarpoq Nunanut Allanut Pisortaqarfik aaqqissuussaanikkut Siulittaasup Naalakkersuisoqarfianut nuunneqarmat. Kiisalu nunanik avannarlernik suleqateqarneq qitiusumut inissinneqarportaaq. Tamanna Aningaasaqarnermut Naalakkersuisunut ilaasortap susassaqarfianut maanna ilanngunneqarpoq, Aningaasaqarnermut Naalakkersuisumik sullissinermi suliassat Nunanut Allanut Pisortaqarfimmiiginnartut. Nunanut Allanut Pisortaqarfimmi 2009-mi augustimi Niuernermut, Silaannaap pissusaanut EU-mullu tunngasunut allaffik pilersinneqarpoq, tassani niuernikkut naalakkersuinikkut ingerlatsineq, silaannaap pissusaa pillugu isumaqatigiinniarnerit, Branding (nunamik ersersistsiniarneq?) EU-mullu attaaveqarneq ataqatigiissaarneqarput.

Naalakkersuisut nunanut allanut sullissivii 2009-mi septemberimiit 15-inik inuttaqarput, ima agguataarsimasunik:

• Nuummi: Suleqataasut qulit
• Københavnimi: Suleqataasoq ataaseq
• Bruxellesimi: Suleqataasut sisamat

Nuummi sulisut akornanni ataatsip pingaarnerutillugu suliassarai aallartitaqarnikkut ileqquusunik nakkutigisassat, naak suliassat ilaat nunanut allanut tunngaqqissaanngikkaluartut. Taassuma suliassaraa isumagissallugu Kalaallit Nunaanni Namminersorlutik Oqartussat aamma Danmarkimi nunanilu allani suleqatit akornanni naapeqatigiittarnerit ileqqorissumik pisarnissaat.