Aleqa Hammondip James Cain naapippaa

Ataatsimiinneq pisortatigoortuunani ilisimatitseqatigiinneruvoq siunertaaraalu Joint Committeemi allanilu suleqatigiinneq ataatsimiinnissallu aamma ALCOA pillugu paasissutissanik nalinginnaasunik ilisimatitseqatigiinneq.

Aleqa Hammondip USA-p nunanut allanut ministerianik naapeqateqarsinnaanera amerikamiut aallartitaata kissaatiginartuutippaa, tassani Qalasersuaq pillugu ataatsimeersuarnissaq Ilulissani maajip naanerani pisussaq ilaatigut oqaluuserineqarsinnaalluni.

ALCOA-p Kalaallit Nunaanni pilersitsiniarnera pillugu innuttaasut isumaannik kommunellu suleqatigineqarnerannik amerikamiut aallartitaat naatsumik ilisimatinneqarumasimavoq.

Suliffissanik pilersitsisoqarnissaa pitsaasuusoq aamma kommunet Kalaallit Nunaanniittut ALCOA-p pilersitsiniarneranut suleqataasut unnersiortarsimanerat Naalakkersuisup erseqqissarpaa. Aamma Naalakkersuisup erseqqissaassutigaa, ALCOA-p Kalaallit Nunaanni sulineranut atatillugu nunatsinni aqutsisoqatigiit siullertut attavigineqartarnissaat.

Naalakkersuisup Namminersornerullutik Oqartussani allaffissornermi pisariillisaaneq ilisimatitsissutigaa, tamanna amerikamiut tungaannit malinnaaffigineqartoq oqaatigineqarpoq.

Annertunerusumik paasiniaavigineqarsinnaavoq: immikkoortortami pisortaq Lida Skifte Lennert, Nunanut Allanut Pisortaqarfik, oqarasuaat: 53 05 32.