- Maani tikeraarnera naammagisimaaqaara. Pitsaasumik ataatsimiissimavugut oqaloqatigiilluarlutalu, Aningaasanut Nunanullu allanut naalakkersuisoq Josef Motzfeldt Canadami tikeraarnini pillugu taamak oqarpoq.
Naalakkersuisunut ilaasortap 28. april 2006-imi ataatsimiinnerit atorpai Canadami nunanut allanut ministeriugallartoq Peter Van Loan Nunanullu allanut ministereqarfimmi qafffasissumik atorfillit arlallit Kalaallit Nunaata nunanut allanut tunngasutigut oqartussaaffii pillugit nassuiaateqarfigalugit. Tamatumunnga tunngatillugu naalakkersuisunut ilaasortaq oqarpoq:
- Isumaqarpunga tikeraarnermi matumani Canadami naalakkersuisunut nutaanut erseqqissarluarsimagipput nunanut allanut tunngasut ataatsimut isigalugit oqallisineqarnerni Kalaallit Nunaat illuatungerisatut tutsuiginartutut isigisariaqartoq soorlu maannarpiaq Hansip qeqertaa - Tartupiluk - pillugu apeqqummi. Aamma Kalaallit Nunaata Danmarkillu akornanni suleqatigiinnerup tunngavigisai annertuumik nassuiaatigaakka. Tamatumunnga atatillugu oqallisigaarput nunat tamat isumaqatigiissutaat illuatungeriilluta malittariaqarigut.
Aamma naalakkersuisunut ilaasortap ataatsimiinnerit atorpai kalaallit pingaartitai allat arlallit oqallisigalugit:
- Canadamiut amiutaannik Great Greenlandip piseqqusaajunnaarneranik aalajangernermut tunngavigisatta tunuliaqutaat nassuiaateqarfigaara, tamatumali peqatigisaanik erseqqissarlugu canadamiut piniariaasii apeqquserniannginnatsigit. Tamatumani Kalaallit Nunaat Canadalu peqatigiikkunik pitsaanerpaassaaq. Aamma periarfissaq atorpara ilungersuutigalugu kalaallit Canadamut neqinik tunisisarneranni uumasut peqqissuunissaasigut ajornartorsiutit aaqqinnissaannut tamatumanilu canadamiut neriorsuutigaat suliaq tamanna aasap ingerlanerani aaqqinniarsarissagipput. Kiisalu marloqiusamik akileraartarneq pillugu isumaqatigiissuteqarnissamik apeqqut saqqummiuppara malugaaralu canadamiut pitsaanerpaamik aaqqiinissamut peqataarusussuseqartut.
Naalakkersuisunut ilaasortap 29. aparil 2006-ip tungaanut Ottawamiinnini atorpaa Kalaallit Nunaat nunatut takornariarfissatut oqalugiaatigalugu kiisalu atuagaq Kalaallit Nunaanniit assiliartalersugaq atsioqattaarlugu.
- Takutitsinersuarmi tassani takuara maani takornariat pillugit unammilleqatigiinneq qanoq sakkortutigisoq. Taamaattumik takornariarfissatut orniginartuussagaanni takornariartitsisarneq ingerlalluartuusariaqarpoq. Aamma pisoqarfinniittariaqarpugut. Kalaallit Nunaat oqaluttuarisariaqarparput suullu neqeroorutigisinnaanerlugit ilanngullugit. Tamatumunnga atatillugu nuannaajallannarpoq Air Greenland takutitsinersuarmi matumani peqataajumasimammat, Aningaasanut Nunanullu allanut naalakkersuisoq Josef Motzfeldt oqarpoq.
Paasisaqarnerorusukkuit attavigisinnaavat fuldmægtigi Mads Helleberg Dorff Christiansen, oqarasuaat +299 34 50 00 imaluunniit e-mail: mhdc@gh.gl.