RegioStarsimut inaarutaasumik NPP-p suliniutaa 040

Ullumi Rosemarie Elsnerip Kommuneqarfik Sermersuumersuumeersup suliniummik aqutsisoq Kate Stephen skotlandimeersoq peqatigalugu NPP-p suliniutaa ”Older people for older people” (O4O), naliliisussanut EU-p suliniutaanik RegioStarsimit ataqqinarnerpaamik nersornaaserneqarnissaannik innersuussisussanut saqqummiuppaa.

Eu-mi suleqatigiilluni suliniummut Northern Periphery Programme-mut, NPP, Kalaallit Nunaat 2002-miilli peqataavoq. Suleqatigiinnerup taassuma iluani nunatsinni tamani kattuffiit assigiinngitsut, nutaanngorsaalluni tunisassiat nutaat nunani avannarlerni avinngarussimasunut iluaqutaasussat ineriartortinniarlugit, suliniutinut soqutiginartunut peqataapput.

Suliniummi 040-mi siunertarineqarpoq, utoqqaat inuunerisa naleqassusiat pitsaassusiallu pitsaanerulersinneqarnissaat, tassa utoqqaat peqqissuuinnarnissaat aamma sapinngisamik sivisunerpaamik nammineq angerlarsimaffimminni najugaqaannarnissaat anguniarlugu. Utoqqaat imminnut ikioqatigiinnissaannut qanoq ikiorneqarsinnaanersut misissorneqarsimavoq. Kalaallit Nunaanni illoqarfinni Nuummi, Tasiilami, Paamiuni, Ittoqqortoormiini, kiisalu nunaqarfinni Arsummi, Kuummiuni, Kulusummi aamma Qeqertarsuatsiaani misissuisoqarpoq.

Nunat assigiinngitsut suliniuteqarnerat uani pineqarpoq, suliniullu Skotlandimi, Irlandimi, Sverigemi Finlandimilu nunat immikkoortuini arlalinni ingerlanneqarsimavoq. Taama iliornikkut peqataasut nunanit arlalinneersut imminnut ilinniarfigeqatigiissinnaasimapput. Suliniut maanna naammassineqareerpoq, najukkanili oqartussaasunit suliniummi angusarineqartut suli atorneqartarput.

RegioStarsimut tunngatillugu siunertarineqarpoq, nunat immikkoortuisa ineriartortinneqarnerisa iluanni suliniutinik pitsaasunik nassaarniarnissaq. Tamatuma suliniutit immikkuullarissut nutaaliuutaasullu nunat immikkoortuinut allanut pilerinarsinnaasut isumassarsiorfiusinnaasullu ersersittarpai. RegioStars ukiut tallimat tulleriiginnaat toqqarneqarpoq, suliniutaalu 107-it nersornaaserneqarnissamut innersuunneqarlutik.

Suliniutit innersuunneqartut akornanni 24-t nersornaaserneqarnissamut unammisussat toqqarneqarput, taakkununngalu 040 ilaavoq.

Immikkut ittumik nutaaliuutaasoq, aamma suliniut nersornaaserneqarnissamut unammeqataasussaasoq tassaavoq, utoqqaat utoqqaqatiminnut allanut sullissinissamik ilusilersueqataasimanerat tunniussaqarsimanerallu. Tamanna naliliisussanit malugineqarsimavoq.

RegioStarsip nersornaasigaa Bruxellesimi juuni 14-iani ”Regions for Economic Change” pillugu ataatsimeersuarnermi saqqummiunneqassaaq. Maanngaanniillu pitsaanerpaamik iliuuserisinnaasarput tassaavoq, 040-p iluatsitsilluarnissaannik kissaassinissarput.