EU-p nunatsinni ilinniartitaanernut tapiissutai atsioqatigiissutigineqarput

EU-p 2011-mut Kalaallit Nunaata missingersuutaanut tapiissutigisassatut akiligai pillugit isumaqatigiissut Namminersorlutik Oqartussat Bruxelles-imi sinniisaanneersumit Lida Skifte Lennert-imit ullumi 2. december 2011 atsiorneqarpoq.

Atsioqatigiinnissaq sioqqullugu Namminersorlutik Oqartussat EU Kommissionip ingerlatsinermut pisortaqarfiata ineriartortitsinermut aammalu ineriartortinniakkanut tapersiutinut immikkoortortaqarfia (DEVCO) peqatigalugu ukiumoortumik anguniakkat aammalu anguniakkat taakku anguniarnerinut aningaasaqarnikkut piumasaqaatinut sinaakkusiussanut tunngassuteqartunik allakkanut uppernarsaatit arlallit piareersarsimavaat.

Isumaqatigiissut atsiorneqartoq malillugu 2011-mut EU Kommission aningaasanik 200 million koruunit missaannik amerlassuseqartunik akiliuteqarsimassaaq.

Isumaqatigiissutip qulakkiigassaraa Namminersorlutik Oqartussat aningaasanut inatsisaatigoortumik ilinniartitaanernut aammalu ilinniartitaaneq qaffassarniarlugu immikkut ittumik iliuuseqarnermut aningaasaliissuteqarnissaq. Isumaqatigiissut una Peqatigiinneq pillugu isumaqatigiissutip Kalaallit Nunaata EU-llu 2007-imi isumaqatigiissutigisimasaata ilagaa. Peqatigiinneq pillugu isumaqatigiissut 2013-ip tungaanut atuutissaaq.

Peqatigiinneq pillugu isumaqatigiissut timitalersorneqarpoq Ilinniartitaanermut Ilisimatusarnermullu Naalakkersuisoqarfiup, Aningaasaqarnermut Naalakkersuisoqarfiup kiisalu Kalaallit Nunaata Bruxelles-imi Sinniisoqarfiata qanittumik suleqatigiinnerisigut.