Nunani avannarlerni suleqatigiinneq

Tikilluarit

Naalakkersuisut nunanut allanut politikkiannut ilaavoq nunat avannarliit pillugit politikki, tamanna Nunani Avannarlerni Ministerit Siunnersuisoqatigiivini sulinermut sammivoq Inatsisartunullu tunngatillugu sulineq Nunat Avannarliit Siunnersuisoqatigiivini aammalu Nunat Killiit Avannarliit Siunnersuisoqatigiivini pisarluni.

Naalakkersuisut nunat avannarliit pillugit politikkiat makkunannga tunngavinnik aallaaveqarpoq:

1. Naalakkersuisut politikkiat ersersinneqassaaq nunat immikkoortuini politikkikkut suleqatigiinnermut atatillugu, nunani avannarlerni suleqatigiinneq pillugu Helsingfors-imi isumaqatigiissummik tunngaveqartoq. (Allagartap uppernarsaatip kalaallisuua perusukkukku NAP@nanoq.gl allaffigissavat) 
2. Naalakkersuisut akisussaalluni naalakkersuisuusutut suliassat akisussaassuseqarfigalugit isigaat, nunat immikkoortuini politikkikkut suleqatigiinnermi kinguneqartussamik tapersiilluni peqataaneq pineqartillugu. Tamanna politikkikkut suliamullu tunngatillugu qaffasissuseqartumit  eqeersimaartumik peqataanikkut pisassaaq.
3. Naalakkersuisut nunanik avannarlernik suleqateqarneq atorusuppaat nunat assigiinngitsut akornanni kattuffinni suliffeqarfinnilu Kalaallit Nunaata politikkikkut soqutigisaasa ilisimaneqarnerulernissaat anguniarlugu.  
4. Naalakkersuisut nunanik avannarlernik kitaanilu avannarlernik suleqateqarnermut atatillugu Kalaallit Nunaanni inatsisartut sinniisuutitaannik eqeersimaartumik suleqateqarniarput nunani avannarlerni ataatsimoorussamik aalajangiinerni kalaallinut iluaqutissat kalaallillu sunniisinnaanerisa qaffassarnissaat anguniarlugu. 

Nittartakkami matumani takuneqarsinnaapput paasissutissat soorlu nunani avannarlerni suleqatigiinnermut tunngavigineqartoq, suliniutit kingulliit pillugit eqqartuinerit, kiisalu ullorsiutit pisussat pillugit paasissutissanik imaalik.